Nongstoiñ, Risaw 20
Ka Assam Rifles ka la ïoh ban khur ïa ka jingjop ha ka jingïalehkai phutbol ba shi sngi ba la tip kum ka ‘One Day Football Match” ba la pynlong da ka Mawkaton Sport Club, hadien ba ka la lah ban pynliem noh ïa ka Shillong Lajong FC lyngba ka tie-breaker da 4-2 kol ha ka lah sngi U Blei ha madan Mawkaton, West Khasi Hills.
Kane ka jingïalehkai ka la long kaba itynnad bad kaba ïakhaid bha. Ka Shillong Lajong ka la ïoh ban pynkhih jar nyngkong eh ha ka minit kaba 15 lyngba u Ribor L.Lyngkhoi, hynrei tang hadien shiteng kynta ka Assam Rifles ka la lah ban pynphai kylla lyngba u Mani Sana ha ka minit kaba 37 na ka bynta ban ïakhaid mar shi kol.
Ka jingthmu jong ka Mawkaton Sport Club haba ka pynlong ïa kane ka lympung ïalehkai kaba shi sngi ka long tang ban pynmih pisa na ka bynta ka klob namar ka don ka jingthmu ban ïashim bynta ha ka lympung ïalehkai jong ka Nongstoiñ District Sports Association (NDSA) ha kane ka samoi ïalehkai ka ban wan.
Ha kane ka sngi nalor ki nongkitkam jong ka klob, la donlang ruh u Sordar ka shnong Mawkaton u Bah Amrose Lyngkhoi, ki riew rangbah kiba la sam ruh ïa ki khusnam sha baroh ar tylli ki kynhun.
