Shillong, Risaw 20
Ka Sur U Paidbah Raid Nongkhlieng ha ka jingïalam u Bah Joinsing Dkhar, Chairman, u Bah P Khongkliam, ki riew rangbah bad nongshong shnong na ki shnong kiba hap hapoh ka Raid, ha ka 20 tarik u Risaw 2025 ka la lum da ka jingïalang paidbah ba kynthup naduh ïa ki Rangbah Shnong ha madan phutbol ka shnong Nongmadan Shadsngi ban ïakren halor ka jingpynkylla Ri Bam Syiem ïa ka jaka ban ïaid ka jingshna surok By Pass lyngba katei ka Raid kaba hap hapoh Hima Khyrim.
Ka Sur U Paidbah Raid Nongkhlieng ryngkat ki lama ïong bad ki plakad ka pyrshah jur ïa katei ka jingthmu bad ka shim ba ki khun ki hajar ka Raid kin kylla sohpdung bad yn myntoi da kiwei pat ha ka jingwanrah ban shna ïa ka Pynursla Bypass ban ïa kata ban pynkylla Ri Bam Syiem.
Khlem da pyrshah ïa ka jingwanrah ïa ka jingtyrwa shna surok ne ka roi, la don napdeng ki khun ki hajar ka Raid kiba la wad jingtip da ka Right To Information na ka ophis SDO Pynursla Civil Sub-Division halor ka jinglong trai ïa ki jaka ban ïaid ka Pynursla Bypass kaba la dep ruh ka jingsorjamin bad sah sa tang ban siew ïa ka bai lutksan khyndew.
Ka jubab RTI ka la sei madan ïa ka jingthoh ba la phah da ka ophis SDO Pynursla Civil Sub-Division sha u Dr. Balajied Syiem, Pa’iem ka Hima Khyrim ha ka 12 tarik u Rymphang, 2025, kaba pan jingshai halor ka jingïakam jaka ha shi lynter ban ïaid katei ka surok.
Ha ka jingpynshai u Syiem ka Hima Khyrim ha ka 5 tarik u Lber, 2025, la kdew ba ka jaka ka hap ha ka Ri Bam Syiem bud nangta sa ka Undertaking da u Sordar ka Raid Nongkhlieng, u Bah Phonis Khongstid bad u Rangbah Shnong ka Nongmadan Shadsngi, u Bah Planningstar Lyngdoh, ha ka 01 tarik u Jymmang, 2025 ba kim don jingpyrshah ban shna ïa ka Bypass.
Kane ka jingkdew ba ka dei ka Ri Bam Syiem kam pynsngewtynnad ïa u khun u hajar ka Raid namar kin duh ïa ka bai lutksan khyndew bad kumjuh ki jaka rep jaka riang.
Ha ka jingïalang ha kane sngi ki nongkren ba kynthup ïa u Bah Ehbok Khongstid, u Bah Kerson Nelar ki la pan jingshai halor kane ka phang ha shwa ka jingkren pynshai da u Rangbah Shnong ka Nongmadan Shadsngi uba la ong ba u la phah jingthoh sha u Sordar halor ka jingpyrshah u paidbah.
Hadien ka jingkren pynshai u Rangbah Shnong, la wan pat sa ka jingkren na u Bah Return Dkhar, u Bah Stanley Khongstid, u Bah Bines Ksanlah bad u Bah Shairong Khongtyngkut.
Ka jingïalang ka la kut da ka rai ba u Bah Phonis u dei ban hiar na ka shuki Sordar ka Raid Nongkhlieng namar ka jingtreikam bym shai jong u halor kane ka bynta kaba ki khun ki hajar ka Raid ki sngew pyrshah.
