Shillong, Risaw 20
Hadien ka jingbymlah ban leh bha ha ka Jylla ha kine ki 5 snem ba la dep, la ong ba ka Congress mynta ka la sdang ban lum ban lang biang bad ban pynbeit ryntih ïalade hashuwa ban leit sha ka ilekshon jong ka Ïingdorbar Thawaiñ ha u snem 2028.
Ki tyllong khubor na ka Congress ki ïathuh ba ka seng ka la ïaid shakhmat ha ryngkat ka jingaiti lut ba pura ban pynkhie im biang ïa ka seng ha kane ka Jylla kaba ka la synshar shisien ka por.
“Ngin sa long ka bor kaba khlaiñ, ka ban ym lah ban kheiñ sting hynrei ngin hap ban ap ïa ka por kaba biang,” ong ki tyllong khubor haba bynrap ba kiei-kiei kin sa wan jia ha ka Jylla.
Katkum ki tyllong khubor ba la ïoh lum, la ong ba shen ka seng kan sa pynpaw ïalade kum ka lad kaba ki paidbah ka Jylla ki lah ban phai khmat.
Ka Congress ka la ïoh ïa ka jingim kaba thymmai la kumno-kumno hapoh ki kyrdan jong ka seng hadien ka jingmih noh jong kiba bun ki Myntri Sorkar ka MDA – bad ka seng ka pyrshang katba lah ban pyndonkam ïa kane ka jinglong-jingman.
Ka jinghiar jong ka seng ka la sdang hashuwa ka ilekshon sha ka Ïingdorbar Thawaiñ jong u snem 2023 ha kaba ka seng ka la pra bad ka bynta kaba khraw jong ki nongïalam jong ka ba kynthup ïa u Dr. Mukul Sangma ki la leit noh sha ka TMC.
Kito kiba sah, ki la shah sospon halor ka jingleit kyrshan ïa ka Sorkar MDA bad hadien baroh ki la ïakhun ïa ka ilekshon na ki seng saiñ pyrthei bapher-bapher.
Watla ka don ha ka kyrdan kaba sha trai duh, hynrei ka Congress ka la lah ban jop ha 5 tylli ki konstitwensi ha ka ilekshon 2023, hynrei hadien kane, kiba bun na ki, ki la mih noh na ka. Tang kawei ka jingjop kaba ka seng ka la mad ha ka Jylla ha kine ki snem ba la dep ka dei ka jingjop jong u Saleng A. Sangma ha ka ilekshon sha ka Tura Parliamentary konstitwensi.
