Jowai, Risaw 20
Ki san kol ba la thep da u Ribiang Dkhar ki la biang pura ïa ka Rymbai Shkenshynriah SC ban pynliem ïa ka Thangskai Tiger SC da 1-5 kol ha kaba sdang ïa ka Super Division Football League 2025 ba pynïaid da ka East Jaiñtia Hills District Football Association (EJHDFA) ha ka lah sngi U Blei.
Tang mar ïasdang ka jingïakhun, ka Thangskai Tiger ka la ïoh ban pynkhih jar ha ka minit kaba 2 lyngba u Syrti Suting. Hynrei hadien shiteng kynta ka Rymbai Shkenshynriah ka la lah ban pynïakhaid kylla lyngba u Ribiang. Hashwa ban kut ka jingïalehkai jong ka kylla step, u Ribiang u la khur syndon ïa ka hat-trick hadien ba u la thep biang sa ar kol ha ka minit kaba 39 & 44.
Hadien katto katne por ba la bteng ïa ka kylla miet, ka Rymbai Shkenshyn -riah ka la thep biang ïa ka kol kaba saw lyngba u Ribiang ha ka minit kaba 49. Une u rangïalehkai shakhmat u la thep biang sa shi kol ha ka minit kaba 90+4 na ka bynta ban pynlong ïa ka Rymbai Shkenshynriah ban khur syndon ïa ka jingjop.
Haba phai sha kawei pat ka jingïakhun kaba ar, ka Chiehruphi SYWSC ka la pynliem noh ïa ka Shilliang Umshong SC da 1-0 kol bad ïa kane ka shi kol la thep da u Rigenncy Lapasam ha ka minit kaba 82.
Ha kane ka sngi la sdang da ka jingïadon lang ki dkhot nongkitkam katei ka synjuk bad kiwei kiwei.
Ka jingïalehkai ha ka sngi Ba-ar kan long hapdeng ka Lad Rymbai B SC pyrshah ïa ka Dhana CSC ha ka por 11:45 mynstep, katba ka Sutnga SSCC ïa ka Diengshynrum SC ha ka por 2:15 nohphai sngi.
Ha kane ka lympung kaba don phra tylli ki kynhun ha kaba kin ïakhun pyrshah bad saw tylli ki ban wan ha ki kyrdan ba shakhmat kin ïoh rung sha ka play-off. Ki ar tylli ki ban bat ïa ka kyrdan ba hakhlieh kin rung sha ka ‘qualifier round’, katba kiwei pat ki ar tylli ki ban wan ha ka kyrdan balai bad saw kin rung sha ka ‘eliminator round’. Katba ki ar tylli ki kynhun ki ban wan ha ki kyrdan ba shatrai kin shah pynhiar kyrdan noh sha ka First Division na ka bynta ka aïom ka ban wan.
