Ki nongshong shnong ha ki thaiñ khappud wat haduh kine ki sngi ki dang mad ïa ki jingeh kiba bun la ngi phai ha ka liang ka suk ka saiñ, ka roi ka par, ka ïoh ka kot ne kiwei-kiwei ki jingdonkam. Ngi la ïoh ban sakhi ba ki jingeh bad jingshah pyndik khamtam ha ki shnong ka thaiñ Block-I, Block-II ki ïai bteng beit na kawei ka por sha kawei pat. Haba phai sha ki nongshong shnong ka Lapangap, la ïohi ba kim ïoh satia ban im ïa ka jingim kaba suk ba saiñ namar na ka por sha ka por ki la shah pyndik beit ha ki jaidbynriew Karbi haba ki leit ban rep ban riang sha la ki lyngka ne ki bri bad kumba ka long mynta wat ban bet bad ot noh ïa u kba uba la ih ruh kim pat shym la ïoh satia.
Ka Block-I bad Block-II, ka dei kawei na ki thaiñ, ha kaba ki jingïakynad hapdeng ki jaidbynriew Khasi Pnar bad Karbi kam dei shuh kaba dang thymmai hynrei kiba la don da ki phew-phew tylli ki snem. Kumba ka paw ruh, ka jingïakam ruh ka jur hapdeng ka Assam bad Meghalaya ïa kitei ki thaiñ hynrei ym lah ban tip pat shano ka Block-I bad Block-II kan leit bad kaei ka ban jia ïa ki paid nongshong shnong jong kitei ki thaiñ. Ngi ïohi ba u Myntri Rangbah ka Jylla Assam u Himanta Biswa Sarma u la pynthikna hakhmat ki nongïalam jong ki seng bapher-bapher jong ki jaidbynriew Karbi ba ka Block-I bad Block-II kan hap beit ha West Karbi Anglong hapoh u pud u sam jong ka Karbi Anglong Autonomous Council (KAAC) bad ba ka Sorkar Assam kan sa sieh mawpud noh katkum ka Notification ka Sorkar ba 17 tarik Naiwieng 1951.
Ki jingshah pyndik jong ki nongrep bad nongshong shnong ka Lapangap ha West Jaiñtia Hills ka dang ïai bteng wat haduh mynta bad kaba sngew synei ka long ba ki nongrep kim pat ïoh satia ban ot ïa u kba uba ki la dep ban trei shitom baroh shisnem. Kane kam dei shuh kaba dang thymmai hynrei jan manla ka por, ka jingshah pyndik jong ki nongshong shnong ha kane ka thaiñ ka ïai jia beit. Watla na ka por sha ka por, ka Sorkar ka ju pynpaw ba ka la shimkhia ban ïakren bad ki bor na Assam hynrei imat kane ka shu kut tang ha ki jingkren, namar ki jingpyndik bad tam pud ki bteng beit.
Ka long ka jingshisha ba ka jingbym pat lah ban pynbeit pura ïa u pud u sam ka wanrah jingeh ïa ki nongshong shnong ha khappud. La 53 snem ka la ïaid kane namar ha ka por ba ïoh Jylla bapura, la ïa klet noh ban ïa peit nangno u maw pud u sdang bad haei u kut. Watla kane ka Sorkar jong u Conrad K Sangma ka la dep ban ïasoi ïa ka soskular ban pynbeit ïa u pud u sam ha ki hynriew na ki 12 tylli ki jaka. Hynrei ka soskular ka la pyni shai ba dei ka Assam kaba ïoh bynta bha na ka jingpynbeit pud. Kiba bun ki la dep ban kdew ba kane ka soskular kam long kaba biang bad hap ban ïapynbeit bha. Tangba u Conrad u pyneh beit triang bad um kwah shuh ban phaidien. Ka Sorkar Assam, haba ka la ïoh ïa ka lad ban ïoh shuh ïa ki jaka bakongsan na Meghalaya, ka kmen haba u Conrad um kwah shuh ban phaidien.
Ka jingïakren ha ka bynta ka kylla ba-ar jong ka jingpynbeit pud ruh ka la sdang lyngba ki Regional Committee hynrei ïa ka jingïakynduh hapdeng ki ar Myntri Rangbah na Meghalaya bad Assam la pynkynriah shi pynkynriah da kaba pynpaw ïa ki daw kiba bun. Mynta lei ngi ïohi ba u Conrad u la ong ba ïa ka kam ïakren khappud yn hap ban buhteng tad ynda la dep ka ilekshon ha Jylla Assam.
Ka Sorkar ka dei ban sngewthuh ba haba jia eiei sha khappud, ka jingktah ka long shaduh sha sor Shillong bad kiwei pat ki distrik. Ka dei ban sngap ïa ka jingdawa jong kiba bun ban phah pulit shajan khappud bad ym ban shong shajngai khnang ba yn dup lah ban tem ïa kano-kano ka jingjia kaba lah ban ktah ïa ka shongsuk shongsaiñ. Ban shu ïa shong sah tang ha sor lane ki Headquarter jong ki distrik kam don jingmut. Ki briew kiba donkam bha ïa ka jingshngaiñ bad jingïada ki dei kiba sah ha khappud. Lada ki shngaiñ ma ki, ka Jylla ruh kan shngaiñ. Hynrei ban phah pulit sha khappud kam mut ban leit ïakynad ne ïasiat markylliang bad ki pulit Assam. Tangba lada mih kaba kum kata ruh, ki pulit ka Jylla jong ngi ki dei ban ïoh ïa ka hukum ba ki lah ban pynphai kylla. Ym dei ban shu sngap kat kaba leh kita ki pulit Assam bad ym dei ban ailad ba kin pynthud ïa ka suk ka saiñ ha khappud namar tang shu thud, ka jingktah kan long sha baroh kawei ka Jylla.
