Shillong, Risaw 20
Hadien hynñiew snem ka Langsning Football Club ka la ïoh ban rah ïa ka nam lahduh ha ka Shillong Premier League 2025 ba la pynïaid da ka Shillong Sports Association, hadien ba ka Mawlai SC ka la ïakhaid mar 1-1 kol bad ka Rangdajied United FC ha ka jingïalehkai kaba khatduh kaba la poi sha kaba kut ha ka lah sngi U Blei ha SSA Stadium kaba ha First Ground, Polo.
Kumba ka paw ka Langsning ka la ïalehkai khatduh ha ka 14 tarik ha kaba ka jop da 5-0 kol ïa ka Malki. Lyngba ka jingtrei shitom ka Langsning ka la ïoh ban bat ïa ka kyrdan ba hakhlieh da kaba kamai 20 point na ki khyndai sien ïakhun, hynrei ka la hap ban ap na ka jingmih jong ki jingïalehkai ka Shillong Lajong (19 point) bad ka Mawlai (18 point) kiba la don ha ka kyrdan ba-ar bad balai namar lada jia kine ki kynhun ki la ïoh ïa ka jingjop, ka Langsning kan duh noh ïa katei ka nam kaba la ap khmih lynti.
Hynrei ka la kylla pat da khongpong ha kaba mynta ka 18 tarik ka Shillong Lajong ki la ïakhaid khlem don ba thep kol pyrshah ïa ka Nangkiew Irat bad hynne ka sngi ka Mawlai ka la ïakhaid mar 1-1 kol bad ka Rangdajied. Te kumta ka Langsning ka la ïoh ban rah suk ïa katei ka nam lahduh ha kane ka aïom.
Haba phai sha ka jingïakhun kaba la long kaba ïakhaid bha ha kaba kim shym la lah ban thep kol ha ka kylla step watla ka Mawlai ka la ïoh ïa katto katne tylli ki kabu ksiar. Dei haka kylla miet ba ka Mawlai ka la pynkhih jar nyngkong lyngba u Ricky Chyne ha ka minit ba 50 bad kane ka la wan lyngba ka corner, hynrei ha ka minit kaba 58, ka Rangdajied United FC ka la lah ban pynphai kylla lyngba u Pasborlang Khonglikong. Kane ka jingïakhaid ka la pynlong ïa kine ki kynhun ban ïai bteng ha ka ban ïakhun tyngeh shuh shuh, hynrei haduh kaba kut kim shym la lah ban thep kol bad kut ha ka jingïakhaid.
Ka Langsning kaba la rah khatduh ïa ka nam lahduh ha ka SPL jong ka aïom ïalehkai 2017-18, ka la long kaba donbok namar ka jingïalehkai bha ka Rangdajied bad ka Nangkiew Irat, ki bym shym la ailad ban shah rem ha ki jingïalehkai ba khatduh jong ki.
Te kumta ki hynriew tylli ki kynhun kiba don ha ka thup kaba hynriew ne Top-6 ha ka SPL 2025 kiba kynthup ïa ka Langsning, Lajong, Mawlai, Nangkiew Irat, Rangdajied bad ka Sawmer ki la ïoh rung sha ka Shillong Super Cup ka ban sa long shen. Ka Langsning kum ka lahduh bad ka Shillong Lajong kaba la wan ba-ar ki la don lypa ha ka kyrdan ïakhun jong ka semi final, katba kiwei pat ki saw tylli kin hap ban ïakhun shwa ïa ka ‘playoff’.
