South America, Risaw:
Ka America, ka la pynbna ha ka Sngi U Blei, sa kawei pat ka jinghiar thma pyrshah ia ki lieng khaïi droks be-aiñ jong ki kynhun runar ka Colombia, kaba pyni ia ka jingtreikam hok bad ka jing pahara ba khlaiñ bor jong ki shipai ka US, ha ki rud duriaw jong ka South America.
Ka khubor halor kane ka jingshah thombor na u heh ka Pentagon, u Pete Hegseth, ka la wan ha ka por ba U President Donald Trump, u ong ba ka America, ka la pynsangeh noh ïa ka jingïarap pisa sha Colombia, da kaba kynnoh ba u president jong ka, u shah ïa ka jingpynmih drok. Kane ka la rah ia ka jingiadei kaba la ialeh pyrshah hapdeng arngut ki paralok kiba la slem bha sha ka kyrdan kaba thymmai.
Ka America, ka la buh ïa ki lieng thma ha Caribbean hajan ka Venezuela, naduh u Nailar bad ka la thombor ïa ym duna ïa ka hynriew tylli ki lieng, kaba ka la ong, ba ki pynïaid ïa u droks sha ka America, ha kaba la ïap ym duna ïa ka 27 ngut ki briew, haduh mynta.
Ki riew shemphang kin buh jingkylli ia ka jinglong aiñ ban thombor ia kum kine ki lieng ha ki um jong ka pyrthei khlem da pyrshang ban khanglad ia kine ban kem ia ki nongtrei bad ban rah ia ki sha ka jingbishar.
Kane ka mat ka la wanrah ïa ka jingïakynad kaba jur bha bad ka Venezuela hapdeng ka jingtieng ba ka thong ba khatduh jong kane ka jingkhynra ka lah ban long ban weng noh ïa u President ka liang kadiang- u Nicolas Maduro, uba ka United States ka ong ba u ïalam ïa ka kynhun nongkhaïi drok.
Ha ka jingleit hiar thma kaba la pynlong ha ka Sngi Thohdieng, u Hegseth u la ong ba ki shipai US ki la hiar thma ia kawei ka jhad kaba u la ong ba ka don ka jingiadei bad ka National Liberation Army jong ka Colombia, ka kynhun shipai lehnoh kaba na ka liang ka diang kaba la tip kum ka ELN ha ka ktien Spain.
U Hegseth, u iathuh ba katei ka jhad, ka iaid ha ki um jong ka pyrthei, ha ka jaka, kaba hap hapoh ka jingkhmih jong ka tnat shipai Southern Command jong ka US, kaba peit ia ki kam pahara jong ka US, ha Latin America. Hynrei um shym la batai bniah pat shano namar kumba la iohi hi ba ka Colombia, ka don ia ki rud duriaw Caribbean bad Pacific.
U Trump u la ïakhun bunsien ha kine ki khyndiat sngi bad u President Gustavo Petro, u nongïalam barim jong ki shipai lehnoh uba la kynthoh jur ïa ka jingpynpoi ïa ki shipai duriaw jong ka US. Dang shen ha ka sngi Saitjaiñ, u Petro u la kynnoh ïa ka America ba ka dei ka jingpynïap briew ha ka jingïap jong u nongtong dohkha na Colombia uba la ïap ha ka jinghiar thma jong ka US ha u bnai Naiwieng.
Ki jingiakren kiba jur bha ki la ialam ia ka jingiadei hapdeng arngut ki paralok ba pawnam sha ka kyrdan kaba rit tam ha ki phew snem. Haduh mynta ka Colombia ka la ioh jingiarap kham bun na ka US ban ia kiwei pat ki ri ha South America — $740 million ha u snem 2023, ong ka jingkhein jong ka sorkar US.
Ha ka Sngi U Blei, u Trump, u la kynthoh jur ïa u Petro, da kaba ong ba um leh ei ei ban khanglad ïa ka jingpynmih ïa u drok watla “ka jingsiew kaba heh bad ka jingai jingïarap na ka USA.”
“Naduh mynta ka sngi, kine ki jingnohsynñiang, lane kino- kino kiwei pat ki jingsiew, lane ki jingïarap pisa ba ka US ka ju phah man u snem, kin ym don shuh kum kita” sha Colombia, ong u Trump ha ka rynsan ‘Truth Social’ jong u, da kaba bynrap ba dei u Petro uba pynshlur ïa ka jingkhaïi ïa u droks.
Ha katei ka jingthoh, U Trump, u la thoh bakla bunsien ia ka kyrteng jong katei ka Ri, kum ka Columbia.
U Petro, u la jubab ia katei ka jingpynbna jong u Trump, da kaba ong ba ia utei u nongialam jong ka US, u shah “pynbiej” ha ki nongai jingmut jong u.
Ha u bnai ba ladep, ka United States, ka la pynbna ba ka la weng noh ïa ka Colombia, kum ka paralok, ha ka jingpyrshang jongka ban ïakhun pyrshah ïa u droks.
Ka Colombia ka la pynphai kylla da kaba pynsangeh noh ïa ka jingthied tiar na ka ri America, kaba dei ka paralok nongkhaïi tiar siat kaba heh tam jongka.
Ka United States, ha ka taiew ba la dep, ka la weng noh ia ka visa US jong u Petro, hadien ba u la kren ha ka jingialang kaba kyrshan ia ka Palestine ha New York, ha shilynter jong ka jingialang jong ka UN General Assembly.
Ha ka jingthoh jong u ha ka Sngi U Blei, U Trump, u la paw ruh ba u ai dak ia kano kano ka jait jingwan tuklar jong ka US ha Colombia, wat la um shym la batai bniah.
