Jowai, Risaw 20
Ha ka jingpyrshang ban pynneh ïa ka shongsuk shongsaiñ ha khappud ka Meghalaya-Assam, ki heh Sorkar na baroh arliang ha ka sngi ka 20 tarik Risaw ki la pynlong da ka jingïalang pynïasuk ha Khanduli Border Outpost (BOP).
Kane ka la wan long hadien ka jingïakynad ba dang shen ha ka shnong Lapangap kaba la shim ïa ka jingim jong uwei u rangbah Karbi uba kyrteng u Oriwel Timung uba dei na ka shnong Tahpat, West Karbi Anglong.
Haba kren sha ki lad pathai khubor hadien ka jingïalang, u Deputy Commissioner ka West Karbi Anglong, u SP Sarma u la khot ban shim ïa ki sienjam ban kiar na ki jingïakynad bad ïatreilang hapdeng ki nongshong shnong khappud, da kaba kyntu ruh ban buh sharud ïa ki kam saiñ pyrthei na ka bynta ka jingmyntoi bad ka shongsuk shongsaiñ hapdeng jong ki.
“Kam dei ban don ka kam saiñ pyrthei halor kane ka kam namar ngi donkam ban im hangne ha ka suk ka saiñ kumba ju long ha ki por kiba la dep,” ong u Sarma haba bynrap ba baroh arliang mamla ki la mynjur ban pynneh ïa ka shongsuk shongshngaiñ bad ban ailad ïa ki nongrep ba kin bteng ban leit ot ïa u kba ha ki lyngkha jong ki khlem kano-kano ka jingshah pynthud.
Ha kane ka jingïalang ba la pynïaid da u DC ka West Karbi Anglong bad u Border Magistrate ka West Jaiñtia Hills, u Bah GH Passah la ïa don lang u Superintendent of Police ka West Karbi Anglong, u R Barua bad u Additional SP ka West Karbi Anglong.
Kiwei pat kiba la ïa don lang ki kynthup ruh ïa u Waheh Shnong ka Lapangap u Ma D Lyngdoh, u Advocate, Bah Erwin K Syiem Sutnga, u President ka Synjuk Ki Waheh Shnong Ri Jaiñtia, u Bah A Lipon, u Waheh Shnong Tapat, bad u President ka Socheng Amreng Border Development Committee.
Ki ophisar na West Karbi Anglong bad West Jaiñtia Hills kynthup ïa ki Border Magistrate bad ki nongmihkhmat jong ka Peace Committee ki la poi sha ka jingïamynjur lang ban ailad noh mardor ban leit ot ïa u kba ha ki lyngkha kiba don ha ka shnong Tahpat bad Lapangap da kaba kdew halor ka jingdonkam kyrkieh shwa ba u kba u tlor noh.
“U mar rep (kba) um lah ban ap sa na ka bynta saw ne san sngi, na ka liang u Rangbah Shnong ka Tahpat bad Lapangap ki la mynjur ba kan ym don kano kano ka jingthut ïa ka suk ka saiñ katba ka jingot kba ka dang ïaid shakhmat,” ong u DC.
U Sarma u la bynrap ba ki bor synshar ka West Jaiñtia Hills ki la pynthikna ban ai ïa ka jingïatreilang kaba pura bad ban lap bad pynngat ïa ki briew kiba donkti halor ka jingshah pynïap jong u Oriwel Timung kaba la jia ha ka 9 tarik Risaw, ki nongleh kam bymman kin shah pynngat katkum ka aiñ hadien ka jingtohkit kaba bniah hapoh ki kyndon jong ka IPC bad BNSS,” u la ong. Nalor kata u la ïaroh ruh ïa ka jingpyrshang jong ki nongïalam shnong, kynthup ïa ki dkhot jong ka Peace Committee ba la ïalam da u Augustine Amse halor ka jingïarap ban pynneh ïa ka jingjaijai bad ka jingïatylli ha ki jaka khappud kiba shong syier.
“Ym lah ban ïapeiñ da lei lei ruh na ka bynta ka jingsuk. Dei ban pynneh ïa ka shongsuk shongsaiñ bad ka jingleit ot ïa u kba ka dei ban bteng khlem da pynslem shuh,” pynskhem u Sarma.
La pynkut ïa ka jingïalang da kaba pynskhem biang ïa ka jingkular na baroh arliang ban pynneh ïa ka shongsuk shongshngaiñ, ban pynthikna ïa ka jingkitkhlieh bad ban khanglad na kino-kino ki jingïakynad kiba lah ban jia biang ha ki bynta khappud ka Meghalaya bad Assam.
