Shillong, Risaw 21
Ka Director General of Police (DGP) ka Kong Idashisha Nongrang ka la ong ba ki kam runar pyrshah ïa ki khynnah rit ha ka Jylla Meghalaya ki la pyni ïa ka jinghiar ha kine ki lai snem ba la dep, watla ki la don ki jingjia kiba la jia khah-khah ha kine ki sngi, kiba la wanrah ïa ka jingsngewkhia.
Haba jubab ïa ki jingkylli halor ka jingshah pynïap ki arngut ki khynnah rit na Nongrah, ka Kong I. Nongrang ka la ong ba ïa ka jinglong jingman ym dei ban peit kum ka jingkiew jong kum kine ki kam runar. “Ki jingkheiñ ki pyni ïa ka jinghiar, watla ka jingsngewkhia ka la wan mih paw na kum kine ki jingjia kiba dang shen”, ka la ong.
Ka DGP ka la pyntip ba katba ki pulit ki dang wad ïa ki nongleh kam sniew ha ka jingjia shah pynïap jong u heprit ba dang hynñiew snem, la ïoh ban kem noh ïa uba suba donkti ha ka kam pynïap ïa ka heprit kaba dang saw snem ka rta.
Ka la kdew ba bun na kine ki jingjia ki dei kiba ïadei bad donkti da ki riew shimet na ki longïing kiba bym long ryntih, kaba pynpaw ïa ka mat kaba kham jylliew ha ka imlang sahlang kaba palat ïa ka jingpyntreikam aiñ.
Ka Kong Nongrang ka la bynrap ruh ba dang shen u Myntri Rangbah ka Jylla u la lum ïa ka jingïalang bad ki nongïalam na ki kynhun bapher-bapher ban ïathir ïatai kumno ban weng ïa kane ka jingeh. “Lymda ngi shim ïa ka rukom treikam kaba pura bad ïatreilang, tang ki pulit marwei kin nym lah ban pynbeit ïa kane”, ka la ong.
