Hong Kong, Risaw:
Ha kane ka jingjia kaba la paw pyrthei ha ka sngi ba la dep, la ong ba ki bor pyniaid ka Hong Kong, ki la pynbna ba la ioh sei ia 2 ngut kiba khlad na ka jingleit hap ka liengsuiñ sha ka duriaw kaba don hajan bad katei ka Kad Liengsuiñ jong ka Hong Kong katba ka dang pyrshang ban hiar noh ha katei ka jaka.
Namar katkum ka video ba la saphriang paidbah, la iohi ia katei ka liengsuiñ kaba la dkut 2 lyngkhot, ha kaba ka khmut bad ka tdong jongka, kim shym iasoh lang shuh.
Ha katei ka video ba la ioh ring na ki camera CCTV kiba don ha katei ka jaka ruh, la iohi ia ki bor pahara duriaw kiba la leit ban poi mar-mar da ki lieng jongki, ban leit pyllait im ia kito kiba don hapoh jong katei ka liengsuiñ.
Katei ka liengsuiñ kaba leit hap bakla sha katei ka duriaw, ka dei ka liengsuiñ Cargo Boeing 747, kaba mih na Dubai bad leit poi sha Hong Kong International Airport ha ka por kumba 4 baje mynstep jong ka Sngi Nyngkong.
Ki bor pyniaid ki iathuh ba ki kali pahara kim shym la don ha katei ka jaka hiar liengsuiñ ban peit-thuh ia ka jinglong jingman jong ka jaka lane jong katei ka liengsuiñ ha ka por ba ka leit hiar ha katei ka jaka.
Katei ka jingjia aksiden ha ka kad liengsuiñ kaba bun briew tam ha ka pyrthei, ka dei ka liengsuiñ, kaba la pynïaid da ka kompeni kit mar jong ka Turkey, ka ACT Airlines, kaba la shu ai wai shipor da ka Emirates.
Ki kompeni liengsuiñ jong ka Emirates, ki la ong ba ym shym la don kano- kano ka mar ha ka liengsuiñ bad la pynthikna ba ki nongtrei ki long kiba lait im.
Ki heh sorkar ki la pynbna ban tohkit halor katei ka jingshah hap, kaba dei kawei na ki jingjia kaba shyrkhei tam naduh ba ka kad liengsuiñ ka la sdang treikam ha u snem 1998.
Kane ka jingjia ka la jia ha ka lynti iaid liengsuin kaba shaphang shathie bad kaba thymmai tam jong ka kad liengsuin, kaba dei ka bynta jong ka projek pynheh ia ka kad liengsuin kaba la kot sha ka $18 billion kaba la pyndep ha u snem ba la dep.
