Missouri, Risaw:
Katkum ki khubor, la ong ba utei u khynnah 14 snem u la duh ei noh ia la ka jingim ha ka jingleit her kulmar jong u kuli ba la ther na shabar jong ka iing jong u, katba u D’Uwan Morgan, u dang lehkai ‘video game’ hapoh ka kamra thiah jong u ha ka 8 tarik jong une u Risaw.
Ki pulit ki iathuh ba katei ka jingsynreit kuli ka la jia hapdeng ka jingiakynad para khynnah samla, ha ka jaka kaba marjan bad katei ka iing ba utei u khynnah u sah.
Bad tang mar ia ioh jingtip halor katei ka jingjia, ki pulit ki la leit her mar-mar sha katei ka thaiñ tang mar ia tip ba don ka jingiather kuli. Hynrei, ynda haba ki poi ha katei ka jaka, ki shem ia utei u khynnah uba la ngat ha utei u kuli bad uba la khlad hajuh.
Katkum ka jingtohkit ba kyrkieh, la shem ba don kiba iasiat na shabar jong katei ka iingsah utei u khynnah, ha kaba utei u khynnah u la shah ksam ha utei u kuli uba wanpoi bakla na shabar bad u la khlad noh syndon katba u dang don hapoh ka kamra thiah jong u, katba u dang lehkai game marwei hapoh katei ka kamra.
Ha katei ka por jong katei ka jingjia, la ong ba ka kmie bad ki 2 ngut kiba shi para bad u ruh, ki don hi hapoh iing, ha kaba ki la iohsngew ia 2 tylli ki kuli kiba ksam ia ka iit jong ka iing jongki. Hynrei uwei na kitei ki kuli, u la leit dei ia utei u khynnah uba dang shong lehkai pynbyrngia ialade ha katei ka kamra thiah.
Ki para marjan ki iathuh ba ki iohi ia ka kynhun jong ki khynnah samla hajan jong katei ka iing, kiba iapoi sha ka jingiakynad bad kiba iasiat markylliang, hynrei baroh na ki, ki la ia kah dur bha ialade bad ym lah shuh ban ithuh ia ki.
Kaba kham sngew shyrkhei ka long ba baroh kitei kiba iakynad ha katei ka jingjia bad kiba iather kuli markylliang, ki dei ki khynnah samla suda bad lehse kiba dang hapoh 18 snem ka rta.
La ong ba u Du’wan Morgan, u dang shu lait na ka klas kaba 8 dang ha kine ki 5 snem ba la dep bad u dang pynkhreh ban sdang ban bteng sa ia ka kyrdan klas kaba 9. Ki bahaiing- bahasem jong u, ki pynpaw ba utei u khynnah u long uba stad bad uba smat ha ka pule- puthi, uba tipsngi bad uba ju sngewtynnad ia ki kam leitkai shabar naduh ka leit shangkai pyngngad, leit khwai bad u ju pynlut ia ka por jong u shabar jong ka iing, hynrei ha katei ka sngi, u da nang hi ruh ban shongkhop hapoh ka kamra thiah ban lehkai game ha ka por kaba katei ka jingjia ba sniewbok ka la wan jia.
