Shillong, Risaw 21
U MLA ka Nongpoh Constituency u Bah Mayralborn Syiem u la ïathuh ba ka jingpyntrei ïa ka surok Nongpoh-Umden ka la ïaid shaid-shaid bad la dep trei kumba 55% haba shim jingkheiñ kyllum.
U Bah Mayralborn Syiem haba kren sha ki nongthoh khubor u la ong ba, ka jingpyntrei ïa ka surok Nongpoh-Umden-Sonapur ka don ar bynta, ha kaba ka bynta ba nyngkong jong ka projek kaba dei na Nongpoh sha Umden ka la ïaid shaid-shaid, kaba ka jingjrong ka long 20 km bad haba kheiñ kyllum kumba 55% ka jingpyntrei ïa ka surok ka la ïaid bad ïa kane la pyntrei bad la bei tyngka da ka skhim na ka Sorkar Jylla.
U la ong katkum ka jingioh jingtip na ka tnad PWD ka la pyntip ba kumba 55% ka jingpyntrei ïa katei ka surok ka la ïaid ba kynthup ïa ka jingshna ïa ki bynta bapher-bapher ki la ïaid shaid-shaid lait noh ka jingsiang rong kaba ym pat sdang eiei haduh mynta, hynrei katkum ka jingïoh jingtip, ka jingpyntrei ïa ka surok ka ïaid sted bha bad la antad ba la kumno-kumno ka jingpyntrei ïa kane ka surok yn lah ban pyndep hapoh jong u bnai Kyllalyngkot jong u snem 2026.
Shuh-shuh u la ong ïa ka bynta ba ar kaba dei na Umden sha Sonapur kaba jrong 38.600 km, ka jingpyntrei ka la sdang ïaid shakhmat hynrei ka kham suki khyndiat bad ïa kane la pyntrei na ka skhim Pradhan Mantri Gram Sadak Yojana (PMGSY), ha kaba u la kyntu ruh ïa u kontraktor ba un kham pynstet ïa ka jingtreikam.
U Bah Mayralborn u la kyntu ruh ïa ki paidbah nongshong shnong ka thaiñ bad ki nongñiah kali ba kin long kiba ïaishah khyndiat ha kine ki por ba dang ïaid ka jingshna ïa katei ka surok, kumjuh ruh u la kyntu ïa ki nongñiah kali shimet, ki kali kit mar bad ki taksi kamai ba kin ïaid katkum ki kyndon ba la buh ban ym pynher sted ïa ki kali haba ki ñiah ban lait na ki jingjia aksiden bad kiba ñiah ïa ki kali arshaka ba kin phong ïa ki helmet na ka bynta ka jingshngaiñ jong ki bad ka leit ka wan jong ki paidbah ban ym jia ki jingjia ba sngewsih.
