Nongpoh, Risaw 21
Kumba long ha baroh shityllup ka ri, ki pulit ka Ri Bhoi ruh hapoh ka jingïalam jong u Senior Superintendent of Police, u Vivekanand Singh Rathore ha ka sngi Ba-ar kila pynlong ïaka prokram kyrpang ban pynkup burom ïa ki pulit kiba la aiti ïala ka jingim bad kyllon ïap ha ka kam, kaba la tip kum ka Police Commemoration Day.
Ha kane ka prokram kaba la pynlong ha phyllaw ka ophis jong u SP ka Ri Bhoi ha Nongpoh, la wan ruh ban ïashim bynta da ki bahaïing hasem jong ki san ngut ki pulit ka Ri Bhoi kiba la kyllon ïap ha ka kam, ki khynnah skul jong ka Nepali Secondary School Nongpoh nalor ki ophisar bad pulit ka Ri Bhoi.
Haba ai jingkren ha kane ka sngi, na ka liang u SSP ka Ri Bhoi, u Vivekanand Singh Rathore u la pynpaw ïa ka mynsiem jingsngewnguh bad burom halor ka jinglenlade, ka jingshlur jong ki pulit ha kylleng ka ri ban ïada bad pynneh ïaka shongsuk shongsaiñ jong ki paidbah.
Utei u heh pulit ka Ri Bhoi ula pynkynmaw ruh ba ha ka 21 tarik u bnai Risaw jong u snem 1959 ha kaba shiphew ngut ki pulit ka ri, ki la shah hiar thma kynsan ha ki shipai ka ri China ha Hot Springs, Ladakh bad dei naduh kata ka por ba ïa ka 21 tarik u Risaw la rakhe kum kata ka Police Commemoration Day.
Ha kane ka sngi, na ka liang u SSP Rathore, u la pule ruh ïaka kyrteng jong ki 191 ngut ki pulit na kylleng ki Jylla jong ka ri India, kiba la kyllon ïap haka kam, ba kynthup ruh ïa san ngut ki pulit ka Ri Bhoi ïa kiba la tip kytreng kum u Raymond P Diengdoh, MPS, DSP (November 7, 2007), Richard Makri, AB Constable (September 28, 1996), Ram Bali Thakur, AB Constable (November 21, 1993), Virendra Kumar Deka, UB ASI (August 20, 2001) bad u Govind Rana, AB Constable (September 28, 1996).
Kum ka dak jong ka jingburom bad sngewnguh ïaka jingshakri jong kitei ki pulit kiba kyllon ïap haka kam, u SSP Rathore u la aiti ruh ïa ki memento sha ki bahaïing hasem ryngkat ka jingleitshaw bad leit buh kyrpang ïa ki na ki jaka sah ki jong ki bad ka jingsynran jong ki pulit.
