Shillong, Risaw 21
U Bah Pynshngain Rattane uba dei u President ka United Khasi People’s Organisaion (UKPO) kaba dei ka seng kaba peit ïa ki Khasi ha Karbi Anglong kaba hap ha Assam, u la kyrpad ïa baroh ki para jaidbynriew kiba shong ba sah ha khappud Meghalaya bad ka Assam ban wanrah ka shongsuk shongsaiñ namar lada mih ka jingïakynad, ka jingma ka ap ïa ki Khasi kiba sah ha Assam namar sawdong la ker da ki shnong Karbi.
U la kyrpad ïa ka shnong Lapangap ban wanrah ïa ka shongsuk shongsaiñ ha khappud.
Kumta u la kyrpad, ban wanrah ïa ka jingshongsuk donkam ka jingïakren ïasuk namar ka jingïapynibor mar kylliang ka wanrah ka jingsngewsih ïa kiba tlot bor.
Kumban shu pynkynmaw, ki Khasi kiba sah ha Karbi Anglong District ki don palat arphew san hajar ngut hynrei ki Khasi kim shongshngaiñ lada don ka jingïakynad ha khappud.
Kumban shu pynkynmaw ka jingmih biang ka jingïakynad hapdeng ki Karbi bad ki Khasi kiba sah ha khappud ka dei ha ka 9 tarik mynta u bnai Risaw namar haba ki paidbah jong ka shnong Lapangap ki leit ban ot ïa u kba hynrei ki Karbi ki la wan pyndik ïa ki watla baroh ar liang kata ki pulit Meghalaya bad pulit Assam ki la ap pahara.
Kane ka jingwan pynthut ki Karbi ïa ki nongshong shnong Lapangap ha ka jaka ot kba ka la pynlong ïa uwei u Karbi ba un duhei ïa la ka jong ka jingim namar ka jingmih ka jinghuri hura.
