Shillong, Risaw 21
Ka All Meghalaya Karate-Do Association (AMKA) kan pynlong ïa ka lympung ïalehkai 31st State Karate Championship naduh ka sngi Palei (23 tarik) ha J.N Indoor Stadium, Polo.
Ïa kane ka lympung ïalehkai kaba lai sngi lynter, kaba la kyrshan da ka tnat ïalehkai ka Sorkar Jylla, la khmih lynti ba ki nongïalehkai na kylleng ka Jylla kin wan ïashim bynta ban pyni ïa ki sap ïalehkai ba kyrpang jong ki.
Ha u snem ba la lah ka East Khasi Hills ka la rah nam lahduh ha ka liang ki kynthei bad shynrang, katba ka Eastern West Khasi Hills ka la wan ba-ar ha ka liang ki shynrang bad ka Ri-Bhoi ha ka liang ki kynthei.
Ïa kane ka lympung yn pynkut ha ka sngi Saitjaiñ ha kaba u Myntri ka Sorkar Jylla u Bah Sanbor Shullai, MLA un long u kongsan, katba ha ka sngi sdang yn wan ban plie da ka Commissioner and Secretary bad kaba long ka Vice President ka MSOA ka kong Matsiewdor War Nongbri.
