Shillong, Risaw 21
Ka Nongtluh Mathan Marmaiñ Development Forum (NMMDF) ha ka jingïalam u MLA ka Nongpoh Constituency u Bah Mayralborn Syiem ha ka sngi Ba-ar ka la leit ban buddien haba ïadei ka jingdawa ïa ka Umden Community & Rural Development (C&RD) Block ha Ri-Bhoi District ha kaba ki la leit ïakynduh ïa u Symbud Myntri Rangbah ka Jylla u Bah Prestone Tynsong.
Ha kane ka jingïakynduh ïa u Symbud Myntri Rangbah ka Jylla, ka Forum ka la phah tuklar ban pynurlong ïa ka jingdawa ki paidbah nongshong shnong ka raid Nongtluh, Mathan bad Marmaiñ ban pynïoh ïa ka Umden Block.
U Bah Mayralborn Syiem MLA ka Nongpoh Constituency haba kren sha ki nongthoh khubor ula ong ba, kumba ka long mynta ki shnong kiba don hapoh ki lai tylli ki raid kiba kynthup ka Nongtluh, Mathan bad Marmaiñ ki hap hapoh ka jingpeit ka Umling Block kaba dei ka Block kaba heh tam ha Ri-Bhoi District.
“Kane Ka jingdawa ban ïoh noh ïa ka Umden C&RD Block ka dei shibynta ban don ka jingïajan hapdeng ka Sorkar bad ki paidbah bad kane ka mat ka dei kaba la dawa la kham slem, ha kaba nga kum u MLA ruh nga la ju kren barabor ïa kane,” la ong u Bah Mayralborn.
Shuh-shuh u la ong, kumba ka long mynta ka Umling Block ka ai jingshakri ïa palat 224 tylli ki shnong, namar kane ka daw ba la donkam eh ban pynkha noh sa kawei ka Block ba thymmai kata ka Umden C&RD Block na bynta ba kan long ka jingmyntoi ïa ki paidbah ka dong ka thaiñ.
U Bah Mayralborn ula ïathuh ba, ha ka jingïakynduh bad u Symbud Myntri Rangbah, u la pyntip ba ka Sorkar ka la bthah ïa ka ophis u Deputy Commissioner (DC) Ri-Bhoi District ban peit bñiah ïa ka jingdawa Umden C&RD Block bad ban pynbiang ïa ka kaiphod halor ka jingdawa.
“Hadien ka jingïakynduh ïa u Symbud Myntri Rangbah ngi ngeit bad ngi khmih lynti ba ka Sorkar kan shimkhia ïa kane ka jingdawa ki paidbah ka thaiñ Umden na ka bynta ka bha ka miat ki paidbah ka thaiñ” ula ong.
Haba bynrap ïa kane u Bah Arnol Syngkli Chairman ka NMMDF u la ong ba, lada pynkha noh ïa ka Umden C&RD Block ruh kin don kumba 130 tylli ki shnong kiba don tang hapoh lai tylli ki Raid kata ka Nongtluh, Mathan bad Marmaiñ bad kine ki shnong ki jngai ym duna ïa ka 80 km ban poi sha ka ophis ka Umling C&RD Block namar kata la donkam eh ban pynkha noh da ka Umden C&RD Block khnang ban pynjanai bad pynjan ka jingshakri paidbah.
