Shillong, Risaw 21
Ka Kynhun ki pulit Anti-Narcotics Task Force (ANTF), ka Special Operation Team (SOT), ki ophisar ka tnat Excise bad na ka Forest, ha ka sngi Ba-ar, kila hiar ban leit pom bad jynrat naphang ïa ki dieng ‘Ganja’ kiba rep ha ka shnong Laitlulong, kaba hap hapoh ka Hima Sohiong.
Kane ka jingleit pom bad jynrat ka la long na ka jingïoh jingtip ba ka don ka jingthung beaiñ ïa u ganja ha ka shnong Laitlulong, Sohiong. Ha kane ka jingleit pom bad jynrat ïa u ganja la ïa sakhi ruh da ki nongïalam shnong ka Laitlulong.
Ka kynhun ki Pulit kiba don haduh 120 ngut tam, kynthup kiba na Shillong bad na Sohiong, kila rung ha man ki ïing kiba rep ïa ki dieng ganja ha ki kyrpong ïing, phyllaw bad ha ki kper ban pom bad jynrat khlem da ieh shuh wat tang uwei u dieng ruh. Ha kane ka jingpom bad jynrat, ki la ïoh ban pynjulor noh haduh kumba 10 ton u ganja ba la rep ha ka jaka kaba heh haduh kumba 5 hectares ha Laitlulong.
Lah ban kdew hangne, kane ka thaiñ ka dei kaba la bna nam bha halor ka kam rep ganja ïa uba ju wan khaïi sha Sor Shillong bad kylleng ki jaka.
U Superintendent of Police ka East Khasi Hills, Bah Vivek Syiem u pyntip ba ïa une u ganja la rep ha ka jaka kaba heh kumba 5 hectare bad pynkynmaw ïa ki paidbah ba ka jingrep ïa u ganja ka dei ka kam bymman bad kan khring ïa ki kyndon bapher-bapher ka NDPS.
Ki bor pulit hadien ba ki la dep pom bad jynrat ïa u ganja ba la thung ha ki kper bad kyrpong ïing briew ha Laitlulong, ki la thang noh syndon ïa u ha katei ka shnong ha ka por nohphai sngi.
Ha kaba ïadei bad kane ka kam thung ganja, ki pulit kin dang tohkit bad kem ïa kiba dei trai. La ïoh jingtip ba bun na kine ki jaka ki dei jong ki riewshimet bad ki pulit ki dang lum jingkheiñ ruh ba haduh katno akar ka jaka la pyndonkam ban thung ïa une u jingdih pynbuaid.
