Shillong, Risaw 21
Ka India ka la mad ïa ka jingshah rem ha ka Iran da 2-0 kol ha ka jingïalehkai kaba nyngkong jong ka Tri-Nation International Friendly kaba la long ha ka sngi Ba-ar ha Jawaharlal Nehru Stadium, Polo.
Kane ka nam jop jong ka Iran ka la wan urlong lyngba ka Sada Didar kaba la ïoh ban thep baroh ar kol ha ka kylla miet hakhmat ki spah ngut ki paidbah kiba la wan sakhi ïa kane ka jingïalehkai jong ki kynthei kaba la long ha ka sien kaba ar ban ïoh pynlong ha kane ka nongbah.
Kane ka lympung ka long shi bynta jong ka jingpynkhreh kane ka kynhun ïalehkai ka ri hapoh ka jingïalam u Crispin Chettri (coach) hashwa ban sdang ka AFC Women’s Asian Cup Australia 2026 ka ban long ha u snem ban wan, bad ha kajuh ka por ka long ruh kum ka lad ban jam sha kiwei pat ki kyrdan jong ka FIFA.
Ha ka jingshisha katei ka kynhun ïalehkai ka ri India ka la ïoh ïa ka por kaba kylluid bha ban pynkhreh ïa kane ka lympung namar ka la wan poi sha kane ka nongbah naduh ka sngi Thohdieng jong ka taïew ba la lah, hynrei ka Iran ka dang shu wan ha ka janmiet jong ka lah sngi U Blei bad kam shym la ïoh ban pynkhreh ïa ka kynhun.
Kumba paw ha kane ka jingïakhun baroh ar ki kynhun ki la pyrshang ban ïalehkai bha naduh kaba sdang ha kaba ki la ïoh ïa katto katne ki kabu kiba biang, hynrei kim shym la lah ban thep.
Wat hadien ba la bteng ïa ka jingïakhun jong ka kylla miet, kine ki kynhun ki la pyrshang khamtam ka India, hynrei kam shym la lah ban pynurlong. Tang hapoh 30 minit ka Iran ka la ïoh ïa ar tylli ki kabu ksiar ha kaba ka la ïoh ban thep ar kol lyngba ka Didar ha ka minit kaba 64 & 74. Haduh kaba kut ka jingïalehkai ka India kam shym la lah shuh ban pynphai bad ka la mad ïa ka jingshah rem.
Te kumta ka Iran kan pynkhreh biang ïa kawei pat jingïakhun pyrshah ïa ka Nepal ha ka 24 tarik, katba ka India ïa ka Nepal ha ka 27 tarik mynta u bnai.
