Nongstoiñ, Risaw 21
Ki paidbah nongshong shnong jong ka shnong Mawkhlam-Nongpyndeng ha West Khasi Hills ha ka step jong ka 21 tarik u Risaw, 2025, kila ïa mih na la ïing ban leit wad ïa u Bah Phyrnailin Nongrem, 43 snem ka rta uba la jah rngai naduh ka 13 tarik mynta u bnai.
La ong ba ki nongshong shnong jong ka shnong Mawkhlam-Nongpyndeng kiba la kynjoh ïa ka 18 snem shaneng napoh ki 9 tylli ki Dong jong ka shnong, hapoh ka jingïalam jong u Myntri Bah Balentin Sohlang bad Bah AL Syiem, Secretary ha kane step ryngkat ka wait bad i jasong, ki la rung sha ki khlaw ki btap bad ki lum ki wah ban wad ïa une u khun shnong.
La ong ruh ba ka jingleit wad ka long sha ki phang jong ka Warriat ter-ter shaduh Pengbah bad Mawsnah bad kumjuh ruh sha ki khlaw kiba don harud shnong bad kiwei de ki jaka, hynrei la ong ba ym shym la lap dien satia.
Na ka liang u Bah AL Syiem, Secretary ka shnong Mawkhlam-Nongpyndeng u la ong, ha kane ka jingleit wad antad jong ki nongshong shnong, ym shym la lap dien satia ïa utei u rangbah bad ym shym la don satia kino-kino ki dak ki shin ba un don ha kitei ki bynta ba la leit wad.
U la ong ba ïa mynta ka shnong kan pynkut shwa katne ïa ka jingleit wad hynrei u la kyntu pat ïa ki para nongshong shnong bad kumjuh ïa ki shnong ba marjan ba kin peitngor lem bad lada jia ba don kano-kano ka dak kaba pyni ne lada jia ba ki don jingtip eiei shaphang jong u, kin sngewbha ban pyntip.
