Jowai, Risaw 21
Ka jinglynga pisa kaba la ïaid mynta la bun bun sngi hapdeng ki nongshong shnong ka Lapangap namar ka jingbym ïoh lad ban leit ot ïa u kba namar ka jingshah pynsyier ha ki nongshong shnong Karbi na shiliang khappud ka Assam mynta ka la kut noh hadien ba ki nongshong shnong mynta ki lah ban leit ot noh ïa u kba na ki lyngkha jong ki.
Kane ka la wan long hadien ba ki bor pynïaid District ka West Jaiñtia Hills ha ka sngi Ba-ar ka 21 tarik Risaw lyngba u kyrwoh ka la pyntip ba naduh lashai ka sngi ka 22 tarik Risaw ki nongshong shnong ka Lapangap ki la ïoh ïa ka lad ban leit ot noh ïa u kba na ki lyngkha jong ki kiba don ha ka shnong Lapangap bad Tahpat.
Lyngba u kyrwoh la pynpaw ruh ba hapoh ka jingïalam jong u Myntri Rangbah ka Jylla u Conrad K Sangma bad u Chief Executive Member ka Karbi Anglong Autonomous Council (KAAC) ryngkat ka jingïatreilang jong ki nongïalam shnong, ïa ka mat kaba ïadei bad ka jingleit ot ïa u kba na ki lyngkha la lah ban pynbeit ha kaba ki nongrep kin sdang noh ban leit ot ïa u kba ha Lapangap bad Tahpat.
Nalor kata la pynpaw ruh ba kum ka sienjam ban khanglad na kino-kino ki jingjia bad na ka jingwan tuklar bad pynshit da ki kynhun kiba nabar kaba lah ban pynthut ïa ka suk ka saiñ, na ka liang ki Magistor ha ryngkat ki bor pulit kin don ha kitei ki jaka na ka bynta ka jingshngaiñ.
Ki bor District ki la shim ruh ïa kane ka kabu ban pynpaw ka jingsngewnguh ïa ka jinglong ba ïai shah bad ka jingshaniah kaba ki nongshong shnong ka Lapangap ki la ai hapdeng ki sienjam ba la shim ban pynbeit ïa kane ka jingeh.
Ki bor District kin pynthikna ruh na ka bynta kane ka jingleit ot kba kaba ïaid beit bad kaba shngaiñ bad kaba lait na kino-kino ki jingjia ba sngewsih, bad ka bteng ruh ban pan ïa ka jingïatreilang jong baroh kiba don bynta ban pynneh ïa ka shongsuk shong shngaiñ.
