Shillong, Risaw 21
Na ka jingleit pom bad jynrat naphang ïa u Ganja ha ka 21 tarik u Risaw, 2025, da ki bor pulit ka East Khasi Hills District ba kynthup ïa ki SOT, Anti-Narcotics Task Force, ki ophisar na ka tnat Forest and Environment, Excise ha ka jingïalam u majistor na ki jaka rep ha ka shnong Laitlulong, Sohiong, la ïoh jingtip ba kane ka kam thung Ganja ha katei ka shnong ka dei kaba la ïaid mynta la katto katne snem.
Ki tyllong khubor na katei ka jingleit pom bad jynrat ganja ki ïathuh ba ki longïing ha kane ka shnong ki la jied da kane ka kam ha ka jaka ban rep ïa ki jhur ki jhep bad lehse namar ka dei ka kam kaba kham ïohnong bad suk ruh ban sumar.
La ong ba ki nongshong shnong ki ju wan khaïi ïa utei u Ganja sha Shillong bad bun kine ki jaka thung Ganja ki dei ki jaka riewshimet. Ki Pulit kiba la hiar sha kane ka shnong ki la rung ha man ki kyrpong bad kper ïing jong kiba rep ganja bad jynrat lut ïa baroh kitei ki jait jingthung ba la kheiñ beaiñ.
Ka long kaba lyngngoh ba ki nongshongshnong kila jied ïa ka kam rep ganja ha ka jaka ban rep ïaki jhur ki jhep haba tip shai ba ka jingrep ganja ka dei ka kam kaba beaiñ.
U Bah Lawstar Kharkrang, Rangbah Shnong ka Laitlulong u la kyntait ba ki nongshong shnong ki thung khnang ïa u Ganja bad ong ba bunsien ki pyndonkam ha kaba pynkylla sboh ban thung phan bad kiwei-kiwei pat ki mar rep bad u dei ruh u jait jingthung uba shu mih hi.
Kane ka jubab u Bah Lawstar ka dei hapdeng ka jingleit pom bad jynrat naphang ïa u Ganja da ki bor pulit ka East Khasi Hills District bad kiwei ha ka jingïalam u majistor na ki jaka rep ha katei ka shnong.
U la ong ba um don jingtip la ki don ne em kiba khaïi hynrei kumba paw ka dei beit ba pynkylla sboh bad bynrap ba lada ki pulit ki ong ba u dei u jingthung u bym long kumta u kyrpad ïa ki nongshong shnong ban sangeh noh ka jingthung ganja.
Ula pyntip ba ki bor Sorkar kila bthah ïa u ba un hukum ïa ki nongshongshnong ba ki dei ban ïapom lut ïa baroh ki dieng ganja ba mih ha ki jaka jong ki hapoh ka arsngi-lai sngi ban wan. U ïathuh ba ki pulit kila aiktien ruh ba kin sa wan jurip biang ha kine ki khyndiat sngi ban wan ha kane ka shnong.
