Shillong, Risaw 21
Ki kam tuh kam runar ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh bad shah prong jong ki ïing ki sem ha kylleng ki bynta.
Katkum ka khubor na ki pulit la ong ba u Hiranya Suklabaidya u la ai ka jingujor ba ha ka step jong ka 19 tarik mynta u bnai, ki runar bym lah ban ithuh, ki la rung hapoh ka ïing ka jong u, kaba don ha Hrishikesh Nath Compound, Upper Mawprem, Shillong bad ban tuh ïa ka pisa kaba long T.23,300/-, ka ksiar kaba shongdor kumba T.37,000/-.
Ha kawei pat ka khubor, u Shashi Kant Ray u la ai ka jingujor ba ha ka 16 tarik Risaw, ki runar bym lah ban ithuh ki la prong tuh hapoh ka ïing jong u, kaba don ha Pynthorbah, Block-I, Shillong bad ban tuh ïa ka pisa kaba long T.20,000/- bad ka ksiar.
Katba na ka liang u In-charge jong ka Sonapyrdi Wildlife Beat (EJH) u la ujor ba ha ka 11 tarik mynta u bnai, ki runar bym lah ban ithuh ki la tuh ïa ar tylli ki Wildlife Monitoring Cuddle Back Trap Camera kiba shongdor kumba T.56,000/-, kiba la pyndait hapoh ka Narpuh Wildlife Sanctuary ha ka thaiñ Sakhri ha East Jaiñtia Hills.
Kumjuh ruh u Bah Moris Syrpuh jong ka Sonapyrdi Wildlife Beat (EJH) u la ujor ba ha ka 9 tarik mynta u bnai, ki runar bym lah ban ithuh ki la tuh kawei ka Wildlife Monitoring Cuddle Back Trap Camera kaba shongdor T.28,000/-, ba la pyndait hapoh ka Narpuh Wildlife Sanctuary ha ka thaiñ Wahshyngktat ha East Jaiñtia Hills.
Na ka liang jong u Bah Skilfully Susngi jong ka Khaddum, Wildlife Beat (EJH) ruh u la ujor ba ha ka 11 tarik mynta u bnai, ki runar bym lah ban ithuh ki la tuh ïa ki ar tylli ki Wildlife Monitoring Cuddle Back Trap Camera kiba shongdor kumba T.56,000/-, kiba la pyndait hapoh ka Narpuh Wildlife Sanctuary ha East Jaiñtia Hills.
Na ka liang jong u Marwan Sangma u la ujor ba ha ka janmiet jong ka 11 tarik mynta u bnai, ki runar bym lah ban ithuh, ki la tuh ïa ka kali Mahindra pick-up ka jong u, kaba don ïa u registration number ML13-A-6064 na Mendipathar ha North Garo Hills.
