Shillong, Risaw 21
Ka Magnificent United ka la rah ïa ka Sunday Amateur Cup hadien ba ka la pynliem noh ïa ka Victoria FC da 2-0 kol ha ka jingïakhun final kaba la long ha madan Heh Mini Stadium, Mawlai Phudmuri ha ka 19 tarik u Risaw, 2025.
Ïa kawei ka kol la kum thep bakla hi da u rangïalehkai ka Victoria bad ïa kol kaba ar la thep da u Neviel Majaw.
Katba ïa ka Sunday Amateur League la rah nam lahduh da ka Real Challenger kaba la heh poiñ duh da kaba ïoh khur 28 poiñ, katba ka Magnificent United ka la wan ba-ar da 26 poiñ bad ka Darla FC ha ka kyrdan balai da 17 poiñ namar khyndai sien ïakhun.
Ha kane ka sngi la sam ruh ïa ki khusnam shimet, ïa ka khunsam Top scorer la ïoh da u rangïalehkai ka United u Wallam Kupar Massar hadien ba u thep 12 kol baroh, katba ka nam Best Goalkeeper ka leit sha u Alfaz Nongkhlaw na ka Real Challenger bad Best Player sha u Neviel Majaw na ka Magnificent United.
Ïa kane ka lympung ïalehkai phutbol la pynïaid da ka Madanheh Referee Committee.
La pyniphuh iphieng ïa kane ka sngi da ka jingdon ryngkat ka National Referee ka Kong Ri-ïoh lang Dhar, kum ka kongsan, kumjuh u Bah Jovie Khyriem, ba la bei tyngka ïa ki trophy bad ki jinglut jingsep jong ka lympung, bad kiwei kiwei.
