Shillong, Risaw 22
Ka Meghalaya Police Football Team ka la bteng ïa ka jingjop kaba saw ha ka lympung ïalehkai SSA 1st Division Football League 2025, hadien ba ka la pynliem noh ïa ka Lawsohtun SC da 2-0 kol ha ka sngi Balang.
Kane ka nam jop ka la wan urlong lyngba ki kol ba la thep da u Ñiewkorlang Khyndiah ha ka minit kaba 37 bad u Rapborlang Marweiñ ha ka minit ba 55.
Kumba ka paw ha kane ka jingïakhun baroh ar tylli ki kynhun ki la pyrshang ban ïalehkai bha, hynrei dei ka MLP kaba la lah ban pynurlong na ka bynta ban thep ïa kitei ki ar kol bad ban khur ïa ka jingjop.
Lyngba kane ka jingjop kaba saw ka MLP ka la ïaryngkat mar 12 point bad ka Nongkseh, kaba dang lamkhmat ha kane ka lympung lyngba ka jingïoh ban thep kol bun, katba ka Lawsohtun ka dangïai sah 1 point hadien ba ka la ïakhaid shisien bad shah rem lai sien.
Haba phai sha kawei pat ka jingïakhun kaba la long kham hashwa, ka Mawkhar SC ka la pynliem noh ïa ka Pohkseh SC da 1-0 kol na ka bynta ban khur ïa ka jingjop kaba nyngkong ha kane ka lympung.
Kane ka jingjop ka la wan urlong lyngba u Vobisterfield Marngar, uba la thep ha ka minit kaba 66 na ka bynta ban pynlong ïa ka kynhun ban khur ïa ki lai point kiba nyngkong ha kane ka lympung.
Te kumta ka Mawkhar ka la kamai 4 point hadien ba ka la jop bad ïakhaid mar shisiem bad shah rem ar sien, katba ka Pohkseh ka dang ïaisah ha ka kyrdan ba shatrai bad 1 point.
Ka jingïalehkai ha ka sngi Palei kan long hapdeng ka Ryntih SC pyrshah ïa ka Nongthymmai SC ha ka por 2 baje nohphai sngi.
