Shillong, Risaw 22
Ka Khasi Hills Autono-mous District Council (KHADC) ha ka sngi Balang ka la mynjur ïa ka rai (resolution) kaba la kyntu ïa ka Sorkar Pdeng ba kan weng noh ïa ki jaka riewlum kiba hap hapoh ka jingpeit ka Council na ka Office Memorandum (OM) ka Ministry of Environ-ment, Forest and Climate Change (MoEFCC) kaba pyllait ïa ki jingïasyllok paidbah bad ki jingbishar bniah kum ki projek tih ïa ki marpoh khyndew kum u uranium.
Ki MDC ka liang synshar bad ki MDC ka liang pyrshah ka KHADC ki la shim rai bad mynjur (resolution) ban phah da ka jingthoh sha ka Ministry of Environment, Forest and Climate Change jong ka Sorkar India ba kan pyllait noh ïa ka Office Memorandum (OM) kaba la pynmih ha ka 8 tarik Nailur, 2025 hapoh ka Khasi Hills District namar ha baroh ki jaka ban tih marpoh khyndew ym donkam shuh ban sngap ïa ka sur jong ki paidbah.
Kumta ki MDC jong ka KHADC ha ka dorbar kaba la long ha ka sngi Balang ki la mynjur ïa ka jingshim rai ba la wanrah da u Chief Executive Member ka KHADC, Bah Winston Tony Lyngdoh ban phah jingthoh sha ka Sorkar India ban pyllait noh ïa kane ka Office Memorandum ha ki jaka ha Khasi Hills khnang ban nym don jingktah ïa ka mei mariang lada tih ïa u marpoh khyndew.
Kane ka jingshimrai namar ki MDC ki tieng ïoh ba kane ka jingpynbna da ka Sorkar India ka don jingthmu sha lyndet ban khlong ïa u marpoh khyndew uba remdor ha rilum Khasi u uranium ïa kaba ki paidbah haduh mynta ki pyrshah ban tih ïa une u marpoh khyndew.
