Jerusalem, Risaw:
Ki shipai ka Israel ha ka Sngi Ba-ar, ki la pyntip ba ka Hamas ka la aiti biang sa ia ki 2 tylli ki metiap jong ki nong Israel sha ka Red Cross hapoh Gaza.
Namar naduh ba la pyntreikam ia ka jingsangeh thma kaba la sdang ha ka 10 tarik une u Risaw, ka Israel ka la ioh pdiang ia 13 tylli ki metiap ba la pynphai biang da ka Hamas. Hadien kata, ki don sa 13 tylli pat ki metiap jong ki nong Israel kiba ka dang ap ban pynphai biang da ka Hamas bad ban aiti noh sha ka Israel.
Ha ka jingleit jurip sha Israel ha ka Sngi Ba-ar, u Vice President ka US- u JD Vance, u la kyntu ia ka Israel ba kan don khyndiat ka jingiaishah bad kane ka long ruh ha kane ka por ba ka Israel ka dang ia kulmar hapdeng ka jingiakut bad ka Hamas ban sangeh ia siat bad ban pyndep ia ki kamram ba sah baroh shi katta ba la ïaid ka thma hapdeng ka Hamas bad ka Israel.
La ong ba don bun na kito ki nongshah rahbor kiba la shu duh ei noh ia ka jingim ha ka jingkhyllem bad jingjulor ki iing ba la set bad pynshong ia ki, mynba ki dang don ha ka kti jong ki lehnoh Hamas.
Kumjuh ruh na ka liang ka Israel, la ong ba ka la pynphai noh ia 15 tylli ki metiap jong ki nong Palestine kiba sah ha ka kti jongka, naka bynta ban ia kylliang bad kitei ki briew jongka kiba la khlad ha ka kti jong ka Hamas.
