Nongstoiñ, Risaw 22
Ka seng ki nonghikai kaba la tip kum ka All Meghalaya SSA School Teachers Association (AMSSASTA) kala pyntip ba ka seng ka khlem pat weng duh dam ïa ki jingïakhih hynrei ki shu sangeh shipor namar ki jingïakren bad ka Sorkar ban pynkiew tulop ka dang ïaid shaid-shaid.
Ïa kane la pynpaw da u Babu Peter Thyrniang kum u President haba kren bad ki nongthoh khubor ha Nongstoiñ.
U Babu Peter u la ong ruh ba ka jingïakhih jong ki nonghikai ban dawa pynkiew tulop namar ka jingbym pynkiew shuh mynta la khyndai snem kynthih kala dap 1 snem pura ha kaba ka jingïakhih kala neh haduh 21 sngi hapoh ka madan Malki na ka bynta ka jingbha bad jingmyntoi jong ki para nonghikai jong ka Jylla hi baroh kawei.
U la pynkynmaw ruh ba hadien arphewwei sngi jong ka jingïakhih ka Sorkar ka la khot ïa ki nonghikai ban ïakren bad ban tyrwa ban pynkiew ïa ka tulop jong ki nonghikai bad ka Sorkar kala ong ruh ba kan sa khot jingïalang manla u bnai ban ïai pyntip ïa ki jingpynkhreh jong ka Sorkar halor ka jingpynkiew tulop.
“Ka seng ka khlem pat weng ïa ki jingïakhih haduh kane ka khyllipmat hynrei ki shu pynsangeh shipor namar ba ka jingïakren bad ka Sorkar ka dang ïaid shaid-shaid bad ngin ap ïa ka por bad ka dor haduh katno ka Sorkar kan ai ïa ki nonghikai bad lada ki nonghikai kim hun ïa ka jingai lane pynkiew ka Sorkar ngin hap ban bteng biang ïa ki jingïakhih,” ong u Babu Peter.
Ha kaba ïadei pat bad ki jingkular ka Sorkar, u Babu Peter u la ïathuh ba na ka liang jong ka tnat pule puthi hapoh ka jingïalam u Commissioner and Secretary ka la kular ba kan sa pynkiew ïa ka tulop ha ka dur jong ka ‘pay scale structure’ bad na ka liang jong u Myntri Rangbah ka Jylla ruh ha ka jingïakynduh bad ki nonghikai u la kular ban sdang pynkiew tulop ïa ki nonghikai naduh ka 1 tarik u Ïaïong, 2026 hynrei katno kador ban pynheh u Myntri Rangbah um shym pat la lah ban ong lane batai ym tang kata u Myntri Rangbah u la kular ruh ban sa ai jingai sngewbha khristmas ïa ki nonghikai shwa ka 25 tarik u Nohprah.
