Shillong, Risaw 22
U nongïalam ka National People’s Party (NPP) uba dei ruh u Myntri Sorkar, u Marcuise N. Marak u la pynpaw ba ka jingpynslem ban siew tulop sha ki nongtrei ka Garo Hills Autonomous Dis-trict Council (GHADC) kam dei ban ktah ïa ka jingkyrmen jong ka seng ha ki ilekshon ban wan.
Haba kren sha ki nongthoh khubor ha ka Sngi Balang, u Marak u la ong ba ka seng ka la jan dep ha ka ban pynbeit ïa ki jingeh, bad kiba bun ki nongtrei ki la pynpaw ïa ka jingkmen bad ki la sdang biang ïa ka kam jong ki.
“Ki la sdang ban pynkhreh ïa ki ‘Bill’ bad kiwei-kiwei. Ynda la dep pynkhreh ïa ki ‘Bill’, yn sa siew pisa sha ki (ki nongtrei),” u la pyntikna.
U Marak u la ban biang ïa ka jingkular ka seng ban don ryngkat lang bad ki paidbah man la ka sngi, da kaba ong, “Ngi don miet la bad sngi bad ki paidbah. Ngi long kiba la pynkhreh ban ïakynduh ïa kano-kano ka ilekshon.”
Ha kaba ïadei bad ka jingpynkhreh ïa ka ilekshon sha ka GHADC, u Marak u la pynbna ba ka seng ka la ai jingtip sha ki kyrtong kiba thmu ban aplai na ka seng, ha kaba ïa ka tarik ba khatduh ban pdiang ïa ki aplikeshon kan long ha ka 14 tarik u Naiwieng.
Ka kyndon jong ka seng ban jied ïa ki kyrtong kan long katkum ka “jinglah ban jop” ne ïa kito kiba i-don jingkyrmen ban jop, ha kaba ki jingai jingmut jong ki nongïalam seng kiba ha ki shnong ki thaw kin don ka bynta kaba kongsan.
“Ka jingbuh kyndon jong ngi kan long ba ngin peit ïa kito kiba i-don jingkyrmen ban jop. Kan shong ha ki paidbah. Ngin sa pan jingshai na ki nongïalam ka seng ha ki shnong ki thaw. Ngin sa sngap ïa ki,” u la ong.
U Marak u la bynrap ba la pyrkhat ruh halor ka jinglong kaba ïaineh ha ka seng, hynrei ka jinglah ban jop ka dei ka nongrim kaba kongsan eh.
Haba kylli, u Myntri u la ong, “Nga dang ap ïa ka kaiphod namarba nga dang shu dep shong jingïalang bad ki dkhot jong ka ‘Regional Committee’ jong nga myn shi sngi bad nga la bthah ïa ki ban lum ïa ka jingïalang khmih bniah ha man la ka kut taïew, kumta hadien kata ngin sa lah ban tip katno ngut (ki kyrtong ki ïakhun ban ïoh tiket). Ngi dang ai ïa ki phom sha baroh ki kyrtong kiba don jingthmu ban ïakhun.”
Utei u nongïalam ka NPP u la pynpaw ïa ka jingsngewskhem ba ka seng kan sa ïoh pdiang bun ki aplikeshon na ki kyrtong kiba thmu ban ïakhun, kynthup ïa ki kynthei, bad ba ka seng kan ai ïa ki phom sha baroh ki kyrtong.
U la kdew ruh ba ka don ka jingpynkiew khyndiat haba ïadei bad ka bai aplikeshon kaba long T.5 hajar ha kane ka kynti, ïa kaba yn pyndonkam da ki ophis ha ki distrik.
