Shillong, Risaw 22
U Executive Member (EM) ka Khasi Hills Autonomous District Council (KHADC) u Bah Powell Sohkhlet u la pyntip hapoh ka ïingdorbar jong ka KHADC ba ka ktien Hindi ka dei ka ‘National Language’.
U Bah Powell u la pyntip ïa kane, haba ka la don ka jingpynpaw jingbynñiaw na ka liang jong u Nongïalam ka Liang Pyrshah u Bah Titosstarwell Chyne halor ka jingkren jong u Executive Member (EM) Bah Seiborlang Warbah, uba la pyndonkam ïa ka kyntien ne jingkren da ka Hindi kaba ong ‘Kuch Kuch Hota Hai’ bad kaba u la pynkylla sha ka Khasi ba don eiei sha lyndet.
U Bah Titos u la ïeng ban pynpaw ba na ka liang u Bah Powell Sohkhlet dang ha ki khyndiat kynta eiei u la pynpaw ba lada long kaba lah ïa ki jingkylli ne kiwei ki ban ïa thoh da Khasi ne ban ïa pule ruh da Khasi, te yn ïakren aiu shuh haba mynta la mih sa da ka ktien Hindi hapoh ka ïingdorbar.
“Ha ka jaka ban ïa ong ïa pynmih tang ktien Khasi nai pynmih shuh ka ktien phareng hynrei mih syndon da ka ktien Hindi, ngin ïaleh kumno, ïakren Hindi noh,” ong u Bah Titos. Ha kane ka por haba u CEM u la ïeng ban kren pynpaw, u Bah Powell u la ïeng ban knieh ktien bad ong ba ka ktien Hindi ka dei ka ‘National Language’. Halor kane, u Bah Titos u la ong, ka mut ba la pdiang ban ïakren Hindi hapoh ïingdorbar.
