Shillong, Risaw 22
U Nongïalam ka Liang Pyrshah ha Khasi Hills Autonomous District Council (KHADC) Bah Titosstarwell Chyne uba dei u MDC ka UDP na Sohra u la sdang pyni jingkhluit haba u Shongknor, Bah Strong Pillar Kharjana u la knieh ktien ban nym shah ïa u Executive Member ba dei peit ïa ka pla tyngka, Bah Seiborlang Warbah ban jubab biang haba la dep jubab na ka jingkylli ba la buh da u MDC ka Laban Mawprem Bah Ricky Shullai.
Kane ka jingkylli bynrap ba la wanrah da u Bah Titos Chyne ka dei ha ki kynta kylli jingkylli ha ka Dorbar Synrai kaba la sdang ha ka sngi Balang ka 22 tarik Risaw 2025 namar ka Superintendent of Tax ka la phah shithi sha ki nongdie ‘waidong ban siew khajna lyngba ka Professional tax.
U Shongknor u la ban biang ba um shah ïa u EM ban jubab biang ïa kajuh ka jingkylli ba la dep kylli da ki MDC hynrei haba u Bah Titos u sdang ban pyni jingkhluit namar u kwah ban ïoh jingshai kumno ki nongdie waidong kin ïoh shithi haba kim ïoh ka kamai ba palat sanphew hajar tyngka ha ka shisnem, u shongknor u la shah ïa u Bah Seiborlang ban jubab.
U Bah Seiborlang u la ïathuh ba ka jingmih ka shithi ka dei namar ki dang pynkhreh thymmai ïa ka rukom ban siew ïa ka Professional Tax namar ha kine ki snem, kam don ki kyndon kiba shai dei na kane ka daw sa mih kane ka mat ban ïakren hapoh dorbar.
U Bah Seiborlang u la jubab ruh ïa ka jingkylli ba la wanrah da ka Kong Grace Mary Kharpuri kaba dei ka MDC na Nongshken ba ka council ka la ïoh lum pisa na ka Professional Tax haduh shiphew klur,phraphew wei lak, khyndaiphew khyndai hajar hynñiewspah lai tyngka naduh u bnai Ïaïong 2025 haduh Nailur 2025.
U la ïathuh ruh ba ka council ka la ïoh lum pisa haduh hynñiewphewsan lak, khyndaiphew hynriew hajar, khyndaispah laiphew hynriew tyngka tang ha u bnai Lber 2025.
Shuh shuh u la pyntip ba kiba lah ban siew ïa ka ProfessionalTax ki dei tang kito kiba kamai sanphew hajar tyngka shajrong hapoh shi snem.
Ha kawei ka jingkylli ba la buh biang da ka Kong Grace Mary Khapuri halor ka jingai laisen khaïi sha ki bym dei Khasi, u Chief Executive Member u Bah Winston Tony Lyngdoh u la ïathuh ba naduh u bnai Lber 2025 haduh mynta ka jingai laisen khaïi ka long haduh 13 tylli.
