Cairo, Risaw:
Ka kynhun ki nongialam jong ka Hamas ka la leit ban ïakynduh ïa ki heh jong ka Qatar bad ka Egypt ha Cairo ha ka Sngi Nyngkong ban ïakren halor ka jingbteng jong ka jingsangeh thma ha Gaza.
Ki shipai Israel ki la thombor ïa ki phew tylli ki jaka jong ka Hamas ha kylleng ka Gaza ha ka sngi U Blei hadien ba ki lehnoh ki la pynïap ïa arngut ki shipai jong ki bad ka Israel ka la kynnoh ba ka Hamas ka la pynkheiñ ia ka jingïateh kular ba la wanrah da ka US bad kiwei pat ki ri nong pyniasuk ia ka thma Israel bad Hamas.
Ka Hamas ka la kyntait ba ka don kano- kano ka jingtip shaphang ka jingshah thombor bad ha kajuh ka por ka la pynpaw ba ka Israel ka la pynkheiñ ïa ka jingïateh kular ban sangeh thma kaba la sdang naduh ka 10 tarik jong une u Risaw.
La iathuh ruh ba katei ka kynhun, kaba la ialam da u heh jong ka Hamas, U Khalil al-Hayya, kan iakren ia ki jingleit thombor jong ka Isreal da ki liengsuiñ, kaba la pyniap ia ki phew ngut ki paidbah nongshong shnong ka Gaza Strip ha ka Sngi U Blei.
Ka Egypt bad ka Qatar ki la don slem bha kum ki nongpynïasuk ha ki jingïakren bym thikna hapdeng ka Israel bad ka Hamas, da kaba thmu ban pynkut noh ïa ka thma kaba la mih na ka jinghiar thma jong ka Hamas ïa ka Israel kaba khlem pat ju jia mynno mynno ruh ha ka 7tarik Lber 2023.
Ka kynhun jong ka Hamas kan ïakynduh ruh ïa ki heh jong ka Egypt ban ïakren halor ka jingïakren hapoh ka Palestine kaban sa wan kaba la pynlong da ka Egypt bad kaba thmu “ban pynïatylli ïa ki kynhun jong ka Palestine” ong ka tyllong khubor ha ka AFP.
Ka Egypt ka la pynlong bun tylli kum kine ki jingïakynduh hapdeng ki kynhun jong ka Palestine, khamtam eh kynthup ïa ki ar tylli ki seng saiñ hima sima kiba ïakhun tyngeh, kata ka seng Islamist Hamas bad ka Fatah, ha kaba u nongïalam jong ka, u Mahmud Abbas, u dei ruh u president jong ka Palestine Authority.
Ka Hamas bad ka Fatah ki la ïaleh pyrshah da ki phew snem, khamtam eh naduh ba ka kynhun ba nyngkong ka la beh noh da kaba donbor ïa ka kynhun ba ar na Gaza Strip ha u snem 2007.
Hapoh ka jingiateh sangeh thma ba la pynlong da ka US, la tyrwa ia ka bor synshar ba laitluid, ba la pyniaid da ki riew shemphang, ban synshar ia ka Gaza.
Ka Hamas, ka ong ba kam kwah ban synshar ia ka Gaza, hadien ar snem jong ka thma, hynrei ki shipai jongka, ki la kynriah biang sha ki jaka, na kaba ka Israel, ka la kynriah noh, naduh ba la sangeh iasiat.
Katto katne ngut ki heh saiñ pyrthei jong ka Palestine dang shen ki la pynpaw ïa ka jinglah ban don ka kynhun ki nongpynïaid jong ka Palestine ki bym don jingïadei ban pynïaid ïa ka jaka jong ka Palestine.
