Shillong, Risaw 22
U Myntri ka tnad kam jngohkai pyrthei, u Timothy D. Shira ha ka Sngi Ba-ar u la ong ba ki kam jngohkai pyrthei ki la nang kiew bad ïaid shakhmat ha ka Jylla.
“Ha kito ki por, ha u snem 1965 (haba) nga la leit jngoh ïa ka Cherrapunjee, kam shym la don eiei hynrei mynta ki la don bun ki ‘Hotel’ kiba bha bad bun ki briew ki la riewspah bad ki la shna ïa ki ‘Hotel’ kiba bha,” la ong u Shira ha ki nongthoh khubor.
Katkum ka jingong jong u, ki kam jngohkai pyrthei ki la kylla long ka lad kamai kaba kongsan na ka bynta ki nongshong shnong, ha kaba bun ki briew ki ïoh jingmyntoi na kane ka kam.
U Myntri u la pyntip ba ka Sorkar ka la shim ïa ki sienjam ban pynheh ïa ka Kad Liengsuiñ ha Umroi, ha kaba ki liengsuiñ kiba kham heh kin lah ban hiar bad ban wanrah shuh ïa ki nongjngohkai pyrthei sha kane ka Jylla.
U la kdew ruh haba ïadei bad ki kam ban pynheh ïa ka Kad Liengsuiñ Baljek ha Ri-lum Garo.
U Shira haba pynpaw ïa ka jingdonkam ban pynbha ïa ki lad pynïasoh, u la ong, “Shisien ba la dep shna ïa ka jingkieng halor ka Wah Brahmaputra ha Phulbari, kan pynïasoh ïa ka Meghalaya sha Mizoram, Tripura, Manipur, bad kiwei ki bynta jong ka Assam.”
U Shira u la kdew ruh ïa ki tamasa ki ban wan, ba kynthup ïa ka tamasa ‘Cherry Blossom’, ‘Wangala’, bad ka tamasa ‘Megong’, bad pynpaw ïa ka jingthmu ban wad ïa ki jaka thymmai kumjuh ban pynbha ïa ki jaka jngohkai kiba la don lypa.
U la ban jur ïa ka jingdonkam jong ki ‘Homestay’ ha ki jaka nongkyndong, kiba lah ban pynbiang jaka sah na ka bynta ki nongjngohkai pyrthei bad ai jingmyntoi ïa ki nongshong shnong.
U Myntri u la ban jur ruh halor ka jingdonkam ban pynroi ïa ki jingtei ha ki jaka jngohkai pyrthei, kynthup ïa ka jingpynbha ïa ka lynti ban leit sha ki jaka jngohkai pyrthei kum ka krem Siju.
Nalor kane, u la ai nuksa ïa ki kam jngohkai pyrthei haba ïadei bad ki krem ki kroh ha kiwei pat ki ri, ha kaba ka jingpynroi ïa ki jingtei ka la pynlah ïa ki nongjngohkai pyrthei ban wad ïa ki krem da kaba suk bad kaba sngewtynnad.
