Mawkyrwat, Risaw 22
Ka KSU South West Khasi Hills District ha ka 22 tarik u Risaw 2025 ka la leit ban ïakynduh ïa u Bah Barnari Mawlong, IAS, Deputy Commissioner ka South West Khasi Hills District halor ka jingsuba ba ka lah ban dei ka jingthmu ba shalyndet haba ïadei bad ka Geo-Scientific Investigation ba la leh da ka Geological Survey of India haka thaiñ Mawkyrwat hadien ka jingmynjur naka Sorkar Kmie lyngba ka Ministry of Mines.
Ka seng haba kren sha ki lad pathai khubor, ka la kynnoh ba ka don ka jingsuba ba kane ka lah ban dei ba ki leh ïa ka Comprehensive Environmental Impact Assessment kaba dei ka pre-mining activity hashwa ban sdang ïa ka jingtih ïa ki marpoh khyndew tang ban ïoh jingmynjur ïa ki kyndon katba kum ka Environment (Protection) Act, 1986 bad ki kyndon ka International Atomic Energy Agency bad ka World Nuclear Association hashwa ban tih uranium.
U samla Forwardman Nongrem, President ka KSU u la ïathuh ruh ba ka seng ka la ïoh jingtip ba ki shnong ba mut leh ïaka Geo-Scientific Investigation ki dei ka shnong Mawkyrwat, Mawten, Mawlangwir, Nonglang, Wahsiej, Mawkyllung, Marshily, Nongnah Marshilong, Mawtle, Sakwang, Pyndep Sakwang, Jakrem bad Nongmawleiñ Pawphlang.
Shuh shuh u la ong ba ka seng ka don ruh ka jingartatien namar ka Geological Survey of India (GSI) ka shait leh ïa ka Field Survey ban wad uranium ha kiwei ki Jylla ka Ri India kum ha Maharashtra, Chattisgarh bad ha Sonbhadra District jongka Jylla Uttar Pradesh.
Katkum ki kot ki sla ba la lap da ka seng, ka GSI ka thmu ban leh ïa ka Geological mapping, sample collection bad ka Pitting& Trenching kaba kynthup ïa ka jingksam thliew (drilling) kaba lah ban kot 10 metre ne kham jylliew ïa kata kaba la wanrah ka jingartatien shikatdei eh ïa ka seng.
Ka seng ka la kynthoh ruh ba ka GSI ka la wan haka thaiñ Mawkyrwat ka khlem da ai jingtip bniah ne batai bniah sha ki paidbah halor kane ka kam. Ka khlem ai ka jingïasyllok ïa ki shnong bapher-bapher ne ki paidbah hashwa ban ïaid shakhmat ïa ka Field Survey jong ki. Kam shym la don ka jingpynshai haba ïadei bad ka jingthmu jong kane ka Field Survey ba ki wan. Kam shym la don ka jinglong shai ne pyntip halor ki marpoh khyndew ba la shim nuksa na ki shnong. Kam shym la don ka jingpynshai haba ïadei bad ka rukom treikam ba ki leh ïa kane ka Field Survey. Ka GSI ka la wan ruh khlem ka jingtip jong ka KHADC.
Haba ïadei bad kane ka mat, u DC u la ong ba un sa lum lang ïa ki shnong, sengbhalang bad kiwei-kiwei ban phah pynshai ha ka GSI halor kane ka mat, hynrei ka seng pat ka la kren shai ba kan nym ailad satia ïa kane ka kam lada kadei ka kam tih ïa u uranium bad ban khlong ïa u Uranium na ka thaiñ Domiasiat bad Mawthabah.
