Shillong, Risaw 22
Ki MDC ka Liang Pyrshah kiba kynthup ïa ka NPP, UDP, HSPDP bad MDC shimet ki la ther tyngeh ïa ka Executive Committee namar ki la pynkylla langkñia ïa ki ophisar tang namar ki shah kynthoh ha rynsan “social media”.
Kane ka jingwanrah ka mat jingïakren ki MDC Liang Pyrshah ka dei ha ka “Zero Hour” ba la wanrah da u MDC ka Mawshynrut, Bah Sraly Rashir mar shu kut ka kynta kylli jingkylli kaba la sdang ha ka 22 tarik Risaw 2025.
Ki MDC ka Liang Pyrshah ki la ong ba ka jingpynsaphriang ïa ka kyrteng ki ophisar ha social media ba pan jingshai da u CEM ka KHADC ka long kaba pynjah burom ïa ki ophisar bad pynrit mynsiem haba ki treikam nangne shakhmat.
Kane ka jingpan jingshai u CEM ïa ka Superintendent of Tax ka dei namar la sam shithi sha kiba shong die waidong ban siew khajna Professional Tax kaba ka jingïoh jong ki, ka long kaba rit.
Haba shimbynta ha kane ka mat, ka Kong Grace Mary Kharpuri ka la ong ba kam pat ju jia ba u ne ka ophisar kaba yn shah thad ïa ka burom ha ka rynsan “social media” namar ka shithi ba pan jingshai u CEM ka dei ka kam ophis.
Shuh shuh ka la pynpaw ba ki don ki shithi ba ki nongtrei ki la sam hynrei kin hap siew ïa ka Profession Tax tad ynda la ïoh ïa ka jingkheiñ kaba biang.
“Ban ong ba la leh ïa kane ka kam ka dei bym don ka Executive Committee hadien ba la hiar shuki u Bah Shemborlang kam lah ban long namar ka shithi hiar shuki u phah 24 tarik Nailur bad u Lat ka Jylla u pdiang ha ka 26 tarik Nailur bad bthah ïa u ban peit shipor ïa ka Council,” ka la ong.
Katba u Bah Titos Chyne, u Nongïalam ka Liang Pyrshah u la ong ba ka Sorkar ne ka Executive Committee ki leit bad ki wan hynrei ki ophisar ki neh haba kim pat shongthait.
U la pan jingshai la u CEM u la leh aiu ïa une u ophisar namar la pan por hapoh hynñiew sngi.
Shuh shuh u ban biang ba shisien ba la bat ïa ka bor synshar ki bun ki jingkynthoh ym donkam tang ka jingïaroh namar lada kwah jingïaroh nai shim ïa ka jingkitkhlieh.
U Chief Executive Member, Bah Winston Tony Lyngdoh u la ong ba ka dei ka kamram jong u ban pan jingpynshai na ki ophisar lada don ka jingbakla hynrei u khlem don bynta ban pynsaphriang ha ‘social media’ ïa ka shithi ban pan jingshai.
U la ong ba ka Executive Committee kan sa shong pyrkhat ruh ïa ka shithi jubab jong ki ophisar haba ïadei bad kane ka jingsam shithi ban phah siew khajna Professional Tax ïa kiba shong die ‘waidong.
