Shillong, Risaw 22
Ka Meghalaya Police ka la pyllait ïa ka risol jong ka ‘Written Test’ na ka bynta ki post bapher-bapher kiba kynthup ka Unarmed Branch Sub Inspector, Unarmed Branch Constable, Fireman, Driver Fireman, Fireman Mechanic/ Mechanic, MPRO Operator, Signal/ BN, Operator, Armed Branch Constable/Battalion Constable/ MPRO GD/ Constable Handyman bad Driver Constable.
Ïa ka jingpynbna la pynmih da u Dalton P. Marak, IPS Inspector General of Police (SB/Bdr) bad Chairman ka Central Recruitment Board kaba kdew ba ïa ka thup jingïoh mark ki kyrtong, kumjuh ïa ka thup jong ki ‘invalid roll number’ ruh la pynmih ha ka ‘official website’ jong ka Meghalaya Police- www.megpolice.gov.in bad katto katne ki ‘OMR sheet’ ki bym shym la lah ban bishar bñiah namar ka jingbakla buh dak lane ka jingpynrung bakla ïa ka ‘OMR sheet’.
Ki kyrtong ïakhun exam kiba don kino-kino ki jingkylli haba ïadei bad ka risol ki lah ban leit mih sha ka ophis jong ka CRB kaba don ha Shillong, hapoh hynñiew sngi, da kaba wanrah ïa ka ‘orginal admit card’, ka ‘triplicate’ kopi jong ka ‘OMR sheet’ ban pynshisha lane ki lah ban shu phone ha u helpline number 6033164273.
Ka jingpynbna ka la kdew ruh ba ïa ki kyrtong kiba biang ban ïakhun sha ka ‘personal interview’ yn sa jied bad ïa ka tarik yn sa pynbna shen ha ka official website.
