Shillong, Risaw 22
Ka seng kiengatiar Hynñiewtrep National Liberation Council (HNLC) kala pynrem jur ïa ka jingkynthoh jong ka Director General of Police (DGP) ka Jylla ka Kong Idashisha Nongrang.
“Ki kyntien jong ki, ki pyni ba haduh katno ki briew ba don ka snam hynñiewtrep kila jngai nala ka jong ka tynrai bad ka jingieid ïala ka jong. Ka long kaba sngewsih ba kawei na ki briew lajong ki jied ban long ki sur jong ki bor nongwei ha ka jaka ban long ka sur jong ki briew lajong,” ong u General Secretary ka HNLC Bah Sainkupar Nongtraw ha ka kyrwoh ba pyllait ha ka sngi Balang.
Ka HNLC ka khmih ïa ka jingkren ka DGP kum ka jingpyrshang ban kheiñ troin ïa ka jingïathuh ba dei hok na ka bynta ka jinglaitluid ka Hynñiewtrep bad ka jingpyni ïa ka jingkohnguh ïa ka Ri India ha ka jaka ïa ki paid Hynñiewtrep.
U Bah Sainkupar ula buh jingkylli ïa ka jingkren ka DGP ïa ka “rukom treikam jong ngi bad ka Ri jong ngi” da kaba kylli ka rukom treikam bad ka ri jong no kaba ka kren.
Ula kam ba ka bri Hynñiewtrep kam pat aiti ïala ka jong ka jinglaitluid lane pdiang ïa ka jingsynshar ki bor nongwei bad ba ka jingmih ka HNLC kam dei ban pyni ïa ka jingdon jong ka lyngba ki kam umsnam hynrei ban pynneh pynsah ïa ka jingdon ka ri Hynñiewtrep.
Ula ïai ban ruh ba ka seng ka long kaba kloi ban ïakren ïasuk hynrei ka dei ban long halor ka jingïa burom markylliang bad ka jingithuh ba dei hok, ban ithuh ïa ka ri Hynñiewtrep bad ki briew ba kham pher jong ka bad kum ka arliang mamla kaba ïaryngkat kyrdan ha kano-kano ka jingïapynbeit.
