Shillong, Risaw 22
U Myntri ka Sorkar Jylla, u Marcuise N. Marak u la pynbna ba ka jingshna ïa u mot sah kynmaw ne ‘Cenotaph’ u ban neh syndon ha Tura, West Garo Hills kan sa sdang noh shen.
Une u ‘Cenotaph’, uba la shah pynpra kham mynshuwa, la shna biang ban kynmaw burom ïa ki ‘Garo Labour Corp’ kiba la noh synñiang ha ki jingpyrshang jong ki sha ka thma bah banyngkong.
Haba kren sha ki nongthoh khubor ha ka Sngi Balang, u Marak u la pyntip ba ïa ka jingpynwandur na bynta une u mot bathymmai u ban neh shi syndon la dep ban pynbeit bad la mynjur da ka komiti, bad ka sienjam kaba bud ka long ban buh ïa u maw nongrim.
“Ngi la jan sdang ïa ka jingpyntrei na ka bynta ki jingtei ki ban neh shi syndon bad ki jingpynwandur ki long kiba la khreh. Tang namar ki katto-katne ki jingduna ha ka rukom treikam, ka dang shim por katto-katne hynrei shen ngin sa shong ïa ka jingïalang ban wan bad ngin sa buh ïa u maw nongrim na ka bynta u jingtei u ban neh syndon,” u la ong.
U Myntri u la bynrap ba ka komiti ka la rai ban aiti ïa ka kam sha u ‘Architect’ uba la shna pynwandur ïa u jingtei u ban neh syndon.
U Marak u la kam ba ka jingpynpra ïa u ‘Cenotaph’ ba hashuwa ym shym la leh ha ka rukom kaba dei, kaba la ktah pat ïa ki jingsngew jong ki paidbah – kaba la pynlong ha ka ban thaw ïa ka komiti ban khmih bniah ïa ka kam ban pyntrei biang ïa une u mot sah kynmaw.
Na ka liang u Marak u la kular ba u Myntri Rangbah un sa don lang ha ka jingïalang buh maw nongrim, bad shen yn sa pynlong ruh ïa ka jingïalang jong ka komiti ban pynbeit ïa ka tarik.
