Jowai, Risaw 22
Ka Nongkhroh Mawsiang SC ka la rung sha ka semi final ha ka 1st Division na ka bynta ka Hajan Shylla Memorial Trophy 2025 ba la pynïaid da ka Thadlaskeiñ Sports Association, hadien ba ka la lah ban pynliem noh ïa ka Namdong B da 8-0 kol ha ka sngi Balang.
U Rio Myrboh u la thep marwei haduh san kol, katba u Pynsuk Diengdoh u la thep ar kol bad ïa ka shi kol la pynbud da u Snowell Kharsati.
Ha kane ka jingïalehkai quarter final kaba nyngkong kaba la long ha ha Multi Sports Complex kaba ha Wahïajer, ki rangïalehkai ka Nongkhroh Mawsiang ki la lah ban ïalehkai bha naduh kaba sdang ha kaba u Pynsuk Diengdoh u la thep ar kol ha ka minit kaba 6 & 15, katba u Rio Myrboh u la khyrwit da ka hat-trick ha ka kylla step hadien ba u la ïoh ban thep ha ka minit kaba 8, 21 & 23.
Hadien ba la bteng biang ïa ka jingïakhun jong ka kylla miet, ka Nongkhroh Mawsiang ka la ïai bteng ban ïakhun ha kaba ka la thep biang ïa ka kol kaba hynriew da u Snowell Kharsati ha ka minit kaba 51. U Rio u la thep biang sa ar kol ha ka minit kaba 65 & 73 na ka bynta ban pynlong ïa ka Nongkhroh Mawsiang ban khur syndon ïa ka jingjop hadien ba ka liang pyrshah kam shym la lah ban pynphai wat tang shi kol ruh.
Ka jingïakhun quarter final kaba ar kan long ha ka sngi Palei ha kaba ka Jalapang SC kan ïakynduh pyrshah ïa ka Ummulong SC ha ka por 2 baje nohphai sngi.
