Jowai, Risaw 22
Ki nongshong shnong jong ka shnong Lapangap hapoh West Jaiñtia Hills District ki la ïoh lad ban ot biang ïa u kba uba kyrpang tam na ki snem kiba leit ha ka 22 tarik Risaw hadien 12 sngi ka jingïakynad kaba jur bad ki nongshong shnong Tahpat.
Katei ka jingïoh lad ban ot kba biang ka la urlong hadien ka jingshimkhia jong ka Sorkar Jylla kaba la ïakren bad ka Sorkar Assam bad ka Karbi Anglong Autono-mous Council (KAAC) bad ka jingtrei borbah jong ki bor pynïaid district jong ka West Jaiñtia Hills District bad ka West Karbi Anglong District kiba pynlong ïa ka jingïakynduh lang jong ki Lapangap bad ki Tahpat na ka por sha ka por.
Ki nongïalam shnong jong ka Tahpat bad Lapangap ki la ïasoi ïaka soskular ban pynneh pynsah ïaka jingshongsuk bad ban ïatreilang ban weng ïa kino-kino ki jingbym ïa sngewthuh jingmut da ki jingïakren bad kane ka la plie lad ïaka jingot kba biang.
Palat 500 ngut ki nongshong shnong ka Lapangap bad na kiwei-kiwei ki shnong ki la ïa hiar sha ki pynthor ki hali ban ot kba ha ka jingsynran jong ki pulit Assam bad ki pulit Meghalaya.
Ki nongïalam bad ki dkhot jong ka Synjuk Waheh Shnong Ri Jaiñtia kumjuh ki kynhun sengbhalang bapher-bapher nalor kiwei-kiwei, ki la ïawan synran lang ïaki nongshong shnong Lapangap.
Haba ïakren bad ki lad pathai khubor u Superintendent of Police ka West Jaiñtia Hills u Jagpal Singh Dhanoa ula ïathuh ba ki bor synshar district jong ka West Jaiñtia Hills ki hap ban bud ïaki kyndon ba la buh da ka West Karbi Anglong District watla ki don ha kane ka shnong ban ai jingïada ïaki nongrep ban ot ïa u kba.
U Waheh Shnong ka Lapangap, Ma Deimonmi Lyngdoh haba ïakren, ula ainguh ïa U Blei ba dei lyngba ka bor bakhraw jong u, ka plie lad plie lynti ïaka shnong.
“Kane kan dei ka sngi sah jingkynmaw haka jingim jong u nongrep ka shnong Lapangap ba wat hapdeng ka jingduh jingkyrmen namar 5 bnai ki nongrep kim ïoh lad satia ban sumar sukher ïa u kba hynrei mynta ka sngi ki la ïoh ban leit ïuhkjat hala ki jong ki pyntha kba bad ïoh lad ban ot ïa u kba, kane kadei kaei-kaei ka kam bah ba phylla jong U Blei”, la ong u Ma Deimonmi Lyngdoh.
Ula aikhublei kyrpang ïa ki ar Sorkar ka Meghalaya-Assam, ki ar District, kumjuh ki pulit ka Meghalaya-Assam, ka Elaka Shiliangmyntang, ka Synjuk Waheh Shnong Ri Jaiñtia, ki kynhun sengbhalang bapher-bapher bad baroh kiba ïadon bynta ban ïarap ïaki nongrep ka shnong Lapangap.
Uwei pat u nongrep ka shnong Lapangap, ula ong ba une u kba ba mynta u long uba kyrpang tam namar naduh bnai Jylliew mynta u snem kim shym ïoh lad satia ban pynheh pynsan ïa u kba ha ka rukom ba dei hynrei u kba mynta u la phuh ula san haka jingsumar sukher jong U Blei nongbuh nongthaw.
Watla katta, kiba bun ki nongrep kila pynpaw ïaka jingkmen bad la sakhi ïaka dur khmat phuh samrkhie ba ka jingtrei shitom jong ki, kam shym la bijai ei, ha kaba ïa u symbai uba kila bet kila ïoh ban lum lang bad pyndap ïa ki thiar katba ki ïoh ei.
U Chairman ka JAC uba dei ruh u President ka Synjuk Waheh Shnong Ri Jaiñtia, Bah A Lipon ula kyntu ïaki briew kiba nabar shnong ba lada ki wan sha Lapangap kidei ban rah la ki rashi ban ïarap ot kba bad ban lum ban lang ïaki kba ym ban ïa wan pyrta ‘slogan’ namar ka jingpyrta ‘slogan’ kan pynthut pynban ïaka shongsuk shongsaiñ ïa kaba la dep ban ïakren pynbeit bad ki Karbi.
U Damian S War, Vice President Synjuk Waheh Shnong Ri Jaiñtia, ula ong ba kila duh jingkyrmen ban ïoh ïa u kba ha Lapangap, hynrei ka jingtrei shitom ki ar bor district ka West Karbi Anglong bad West Jaiñtia Hills bad ki nongïalam shnong ka Tahpat bad Lapangap la ïoh ban ot noh ïa u kba.
Ula kyrpad ïaka Sorkar Meghalaya ban phai khmat sha kane ka thaiñ ban pynbeit mardor ïaka jingeh u paidbah ka thaiñ khappud, namar ba kane ka jingot kba kaba mynta ka dei tang kaba shipor.
Kumta ula kyrpad jur ïaka Sorkar Meghalaya bad Assam ban shim ïaki sienjam ban weng ïaki jingeh ki nongshong shnong ka Lapangap, kaba la rep ha kane ka jaka naduh ki por mynshuwa.
Ka jingot kba ka sdang haka por 10.00 baje mynstep bad haduh ba kut ka por jingot kba kata haka 4.00 baje janmiet la antad ba la ïoh ban ot duna 11 hectare naka 53 hectare tam ha Pynthor Lapangap.
Kane ka jingot kba kan bteng biang lashai ka sngi bad ruh ki sngi ban wan.
