Jowai, Risaw 23
Ki nongshong shnong ka Lapangap ryngkat ka jing-synran lang ki shnong ba marjan ha ka sngi ba bud ka sngi Palei, ki la bteng biang ïa ka jingot kba ha ki pynthor kiba don ha Umchyr-ngan bad Lakawang hapoh u pud u sam jong ka Lapangap.
Ha kane ka jingot kba, ki pulit Meghalaya bad Assam ki la shong pahara khnang ban lait na kano-kano ka jingjia bad ruh ban pyntikna ba ka jingot kba kan long kaba ïaid beit ïaid ryntih.
Haba ïakren bad u Waheh Shnong, Bah Deimonmi Lyngdoh u la ïathuh ba la wan ïarap ot kba ïa ki nongrep ka Lapangap da ki dkhot ka Hill Farmers Union (HFU).
U la pyntip ruh ba ka jingot kba kan bteng biang ha ka sngi Thohdieng naduh ka por 10.00 baje mynstep haduh 4.00 baje janmiet.
Ha ka sngi Palei ki la ïoh ban ot kba kumba 16 hektar, na ka 53 hektar tam ha pynthor Lapangap.
