Shillong, Risaw 23
Ha ka jingdon jong ki briew kiba don ka mynsiem ban noh synniang ïa kiwei pat kiba duna ha ka ïoh ka kot, ka long ka jingkyrkhu na bynta kiba shem lanot, kiba mad jingeh, ym tang ha ka bam ka dih hynrei wat ha kaba ïadei bad ka jaka sah.
Kane ka dei ka khubor halor kawei ka longïing kaba mad jingeh namar ka jingbymdon ïa ka jaka sah kaba bit ba biang, ka dei ka longïing jong ka kong Abaltis Thabah, kaba shong ba sah ha Mawlai Mawtawar, Laitlum. Kane ka longkmie ka don 4 ngut ki khun bad 2 ngut pat ki dei ki khunswet kiba la ri hi da ma ka, hynrei na ka jingdon ïa ka mynsiem ïatiplem jong ka seng ki samla pule ka skulbah North Eastern Hills University Students Union (NEHUSU), ba la pynshna sngewbha da ka ïing ba paka na bynta kane ka longïing.
Ïa kane ka ïing la aiti noh sha kane ka longkmie ha ka 22 tarik Risaw 2025 da u President Rangbah ka Khasi Students’ Union (KSU) CEC, u Samla Lambokstarwell Marngar, ha ryngkat ka jingïadonlang u samla Biangbor L. Paliar, President ka KSU Mawlai Circle, u Samla Sandy Sohtun, President NEHUSU, u Prof. RL Nongkhlaw, Dean Students Welfare NEHU, u Prof. Lakhon Kma, President ka NEHUTA, u Rangbah Shnong, nalor kiwei-kiwei pat.
Hadien ka jingaiti ïa ka ïing sha kane ka longkmie, na ka liang ka Union ki la pynlong ïa ka jingïalang ba lyngkot ha Community Hall katei ka shnong ha kaba ka la aiti ruh da ki pla kot sha kane ka longïing.
Haba ai jingkren ha kane ka jingïalang ba la pynlong ha Community Hall katei ka shnong u Samla Lambokstarwell Marngar u la ong, ba kane ka jingpynshna ïing ka NEHUSU ïa ki longïing ki ba duna ka ïoh ka kot, ka dei ka kam kaba khraw ba kum ki khun samla ba don hapdeng ka jingpule ki la lah ban leh kaba bha tam ha ka ka imlang ka sahlang.
Shuh-shuh u la ong, ka Sorkar kaba ju kren ban kyntiew ïa ki duk ki suk bad ban pynshna ïing ïa ki ba duk ba duna ha ka ïoh ka kot, hynrei ka ba sngewsih ka long ba Sorkar ka ai sngewbha pynban sha ki katto katne ki heh Saipan.
U la buh jingkylli ruh, “Shaei jah kita ki briew kiba la pynkupbor da u paidbah bad ka bhah ba dei hok ban ïoh u luk u lak bad shaei jah kata ka jingïarap ba u duk u suk u dei ban ïoh” bad u la ai khublei bad kyntu ïa ka NEHUSU kaba la shim ïa kane ka sienjam ban leh ïa kane ka kam bad u kyntu ba kin nang ïai-bteng ïa kane ka kam nangne shakhmat.
“Kane ka juk kaba ngi im, ngi donkam ïa ki atiar ban ïohi jngai, ban pyrkhat jngai bad ban tei ïa ka imlang ka sahlang ha ka lynti kaba shai bad ha ka lynti jong ka jingkyrmen” la ong u samla Lambokstarwell.
