Shillong, Risaw 23
Ka Meghalaya SSA Schools Association (MSSASA) bad ka All Meghalaya Fourth Teachers Association ki la pdiang ïa ka jingthoh jingkular u Myntri Rang-bah ka Jylla u Conrad K. Sangma ban pynurlong ïa ki ar tylli ki jingdawa ba kongsan jong ki, ba ka Sorkar kan shimti hi noh ïa ki skul SSA bad ban ai ïa ka ‘pay structured’ na ka bynta ki nonghikai SSA.
Ïa kane ka Meghalaya SSA Schools Association bad ka All Meghalaya Fourth Teachers Association ki la ai ïa ka jingmynjur ha ka jingïalang paidbah kaba la long ha madan Malki ha ka sngi Palei.
Ha kane ka jingïalang da ki spah ngut ki nonghikai SSA ba na kylleng ka Ri Khasi bad Jaiñtia kiba la wan ban ïa shimbynta bad ha kane ka jingïalang u Bah Aristotle C. Rymbai u la pynsngew ïa ki rai ba mih na ka jingïakren ki nongïalam ka Association bad u Myntri Rangbah ka Sorkar Jylla kaba la long myn ha ka 16 tarik Risaw 2025. Ha kaba u la pan ïa ka jingmynjur na ki para nonghikai da kaba pyni da ka jingïarah kti ban pynpaw ïa ka jingmynjur ïa ka jingkular ka Sorkar.
Haba kren sha ki nongthoh khubor u President ka MSSASA u Bah Aristotle C Rymbai u la ong ba hadien kane ka jingïalang paidbah ka Association da kawei ka sur ka la shim ïa ka rai ban ai jingmynjur ïa ka jingkular ka Sorkar bad u la ai ka jingkhublei ïa u Myntri Rangbah bad ka Sorkar Jylla kaba la shim ïa kane ka sienjam ban pynbeit ïa ki jingeh jong ki nonghikai SSA bad ki nonghikai Fourth Teachers.
U la ong, ban pyntreikam ïa kine ki mat jingdawa ka Sorkar Jylla kan sa ai jingpynbna ha shuwa ka 25 tarik u Nohprah 2025 ïa ka polisi ba kan sa shim haba ïadei bad ki artylli ki mat jingdawa ka Association bad yn sdang ban pyntreikam naduh ka 1 tarik u bnai ïaïong 2026.
