Shillong, Risaw 23
Ka Synjuk ki Khlieh Nongsynshar Shnong Mawsynram ha ka 23 tarik u Risaw 2025, ki la leit ban ïa kynduh ïa u Symbud Myntri Rangbah ka Jylla u Bah Prestone Tynsong ban ïakren halor ka jingsniew tasam ka surok kaba naduh shnong Weiloi ter-ter shaduh sha Balat.
Ha kane ka sngi, nalor ki nongïalam ka Synjuk Khlieh Nongsynshar Shnong Mawsynram, la wan ban synranlang da u MLA ka thaiñ, u Bah Olan Sing Suiñ bad u MDC, Bah Alvin K Sawkmie.
Haba kren sha ki lad pathai khubor, u Bah Hiamdor Rapsang, Chairman ka Synjuk ki Khlieh Nongsynshar Shnong Mawsynram u la ong ba ka surok ha Mawsynram ka la jot rathai mynta la kumba da ki phew snem tam bad ym shym la don kano-kano ka jingmaramot pynbha.
U la ong ba ka surok Mawsynram ka la long kum ka surok naduh ki por ba mynshwa namar ka jingsniew bad khlem pynbha haduh mynta kaba la pynsyier wat ïa kiba ïaid ruh kumjuh.
Haba kylli, u Bah Hiamdor Rapsang u la ong ba ïa ka surok na Weiloi shaduh Mawsynram la shu syrdep kum ka patlun kaba la jot, hynrei mynta ka thaiñ ka la donkam ïa ka patlun ba thymmai, ym shuh ban shu syrdep. Da kaba bynrap ba shu donbok ba mynta u snem ha Mawsynram ka duna ka jinghap slap hynrei lada jia ba jur u slap kum ha ki snem ba la dep, bun ki paidbah kin mynsaw namar ka surok ka la sniew palat liam.
U la ong ba ha ka jingïakynduh, u Bah Prestone u la pyntip ba ïa ka surok na Weiloi-Mawsynram shaduh Phlangwanbroi la pynkhreh da ka ‘Intermediate Road’ kaba la bei pisa da ka World Bank bad ka jingpyntrei ka lah ban dei ha u snem ban wan.
U Bah Hiamdor u la ong ruh haba ïadei pat bad ka surok na Phlangwanbroi ter-ter shaduh sha Balat-Umpung, u Bah Prestone u la pyntip ba ïa katei ruh la sdang ban pynkhreh ban mang kaba kot haduh kumba T.280 klur.
“Nalor ka surok, ngi la dep ban ïakren ruh ha kaba ïadei bad ka jingkieng kaba don ha ka shnong Umpung, kaba dei ka wei ka jingkieng kaba la slem bha, ha kaba katkum ka jingïathuh jong ki engineer ka tei ka jingkieng kam long shuh kaba shngaiñ, ban shah ban kit ïa ki mar kiba khia. Ha kine ki sngi ngi ïohi ba ka jingïaid jong ki trok bad ki kali ‘load’ ka long kaba jur bha, kumta ngi la pynsngew sha u Bah prestone ha kaba ïadei bad kata ruh, ba lada kan dang bteng kane ka jingïaid kai trok kan buh jingma shibun ïa ki paidbah kiba donkam ïa katei ka jingkieng”, la ong u Bah Hiamdor.
Shuh shuh u la ong ba ha kane ka jingïakynduh bad u Bah Prestone ka long kaba seisoh bad u ngeit skhem ba ka Sorkar kan pyntrei noh kham kloi.
