Shillong, Risaw 23
U Prof. Pinakeswar Mahanta Director ka National Institute of Technology Meghalaya u la pyntip ba yn pynlong ïa ka 12th Convocation ha ka 30 tarik u Risaw 2025 ha kaba yn pynkup burom ïa ki samla pule ba la pyndep ïa ki kyrdan pule bapher-bapher, kynthup ïa kiba la pyndep ïa ka kyrdan PhD.
U la ïathuh ruh ba ha katei ka Convocation yn pynkup burom ïa ki 250 ngut ki samla pule ba la pass ïa ka degree bapher-bapher, ba kynthup 153 ngut kiba la pyndep ïa ka B.Tech, 36 ngut kiba la pyndep ïa ka Master in Science, 24 ngut ki M.Tech bad 37 ngut ki ban ïoh pdiang ïa ka kyrdan PhD.
Shuh-shuh u la ïathuh, Ka NIT Meghalaya ka don 107 ngut ki nonghikai, 332 ngut ki nongtrei, 1,215 ngut ki samla pule, 634 ngut kiba pule ha ka kyrdan Undergraduate bad 581 ngut kiba pule ha ka kyrdan Postgraduate bad PhD.
“Ka NIT Meghalaya ka la pynmih ki kyrdan pule ba thymmai kum ka Master of Computer Application, Lai tylli ki B.Tech Program bathymmai, kita ki dei ka Cyber Physical System & Cyber Security, ka Energy Engineering bad ka Power System Engineering, Ka M.Tech in Environmental Engineering bad ki Minors Degree kum ka Sports Engineering, AI data Science bad Energy System.” La ong u Mahanta.
U Mahanta u la ong, ka NIT Meghalaya kan sa pynmih ïa ka Choice Based Credit System (CBCS), ka Academic Bank Credits (ABC) bad kiwei ban kyntiew ïa ka pule puthi bad jinghikai bapher-bapher da ka ba bud ïa ka NEP 2020 (National Education Policy).
Nalor kata u Mahanta u la pynpaw ruh ba ka NIT Meghalaya ka la ïoh shibun ki khusnam ha ka thup ki Engineer NIRF 2025, ka la ïoh pdiang ruh ïa ka khusnam “Mahatma Gandhi Award For Academic Excellence” jong u snem 2025 bad ka la ïoh rung ha ka World University Ranking ha kaba u la kam ba kane ka long ka jingïohnam bakhraw jong kane ka jaka pule.
“Ka NIT ka la ïatreilang bad ïasoi MoU bad 14 tylli ki jaka pule ba pawnam ha ka Ri bad nabar ka Ri kiba kynthup ïa ka Physikalisch-Technische Bundesanstalt (PTB) Germany, ka Technische Universitat Ilmenau Germany, IIT Hyderabad ,IIT Jodhpur, IIT Madras, IIT Vishakhapatnam, Parul University, Oxford University (UK) Dot Pad Inc. (South Korea) bad SCSTE Meghalaya.” la ong u Mahanta.
U Mahanta u la bynrap ba ka NIT ka la pynlong bun jait ki kam na bynta ka imlang sahlang, ka la shim 5 tylli ki shnong ha ka thaiñ Sohra na bynta ban kyntiew ïa ka roi ka par, ka bha ka miat ka imlang sahlang.
U la ong ba ka NIT Meghalaya kan ïaibteng ban ai jingnang jingstad, ki jaka wadbniah, ka jaka ban pynmih ïa ki jingshna ba thymmai ba ka roi ka par kan kiew la ha ka teknoloji bad kiwei kaba pynpaw ïa ka jingaiti jong ka ban wanrah ïa ka bha ka miat ka Ri bad ka Pyrthei baroh kawei.
