Shillong, Risaw 23
Kum shibynta ban kyntiew ïa ki nongrep Sohphlang jong ka thaiñ Mawkynrew bad jong ka Jylla hi baroh ka wei, ka Mawkynrew Sohphlang Eco -Cultural Indigenous Society kan sa pynlong biang ïa ka tamasa ‘Sohphlang’ ha ka 5 bad 6 tarik u Nohprah (December) 2025, ha Lad Kharang Jongksha, East Khasi Hills District.
Haba kren sha ki lad pathai khubor ha ka 23 tarik u Risaw 2025, ha Shillong Press Club, u nongaibuit jong kane ka society u Bah Carmel Lyngdoh u la ïathuh ba mynta u snem ka dei ka sien kaba lai ba ka society ka pynlong ïa kane ka tamasa ‘Sohphlang’.
U la ong ba ha kane ka tamasa, ka society ka thrang ban kyntiew ïa ki para doh para snam khamtam eh kito kiba rep ïa u ‘Sohphlang’.
U Bah Carmel Lyngdoh u la ïathuh ruh ba ha kine ki ar snem kiba la dep bun ki nongwan jngohkai pyrthei ki la wan ban sakhi lang ïa kane ka tamasa bad ai jingïaroh ïa u ‘Sohphlang’ u ba ki ïoh ban bam.
Na ka liang u Bah Pynbianglang Kshiar, President ka Mawkynrew Sohphlang Eco -Cultural Indigenous Society u la ïathuh ba ka society ka la buh kyrpang ïa u ‘Sohphlang’ na ka bynta kane ka tamasa bad ki paidbah kim dei ban tieng ïoh ki duh sohphlang namar ka por ban tih sohphlang ka la kham dier por khyndiat.
U la ïathuh ba ha kane ka tamasa kan don ruh ka jingïakop pyni sap pyniphong ha kaba baroh ki lah ban ïa shim bynta ym tang kiba shong ba sah ha ka thaiñ Mawkynrew.
Ka samla Pynsngewtynnad Rynjah pat ka la bynrap da kaba ong ba ka society kan pynlong ïa ka jingïakop miss, ha kaba ki nongïashim bynta kin hap ban riam kum ki nongrep.
“Kane kan dei ka wei na kiba kham kyrpang ha kaba kam pat ju don ka jingïakop miss kaba ka riam ka beit kan dei thik kumba ki nongrep ki riam haba ki leit sha ki lyngkha jong ki,” la ong ka samla Pynsngewtynnad Rynjah.
