Shillong, Risaw 23
U CEM ka KHADC, u Bah Winston Tony Lyngdoh u la ïathuh ba ïa ka ‘Employee Clearance Certificate’ ka KHADC ka ai por ban kut haduh 6 bnai bad ka dor ka long T.700 na bynta ki nongtrei bar jylla kiba wan bylla shapoh ka Jylla.
U CEM u la pynpaw haba jubab ïa ka mat ïatai ba la wanrah da u MDC ka Mawshynrut, u Bah Sraly Rashir halor ka ‘Non-tribal Employee Clearance Certificate’ ha ka Dorbar kaba la long ha ka 23 tarik Risaw 2025 ha kaba la shim bynta lang ka Kong Grace Kharpuri, Bah Ricky Shullai bad Bah Titos Chyne.
U Bah Winston u la ong ba ïa ki ‘Labour License’, ba la ai da ka Sorkar bunsien la ïohi ba ki briew kiba nabar kim pat wan rung ha ka Jylla hynrei ki la dep ïoh pat ïa ka ‘Labour License’.
Kumta u la pynshai ba ka jingleh ka EC ka KHADC ban ai ïa ka ‘Clearance Certificate’ ka dei na ka bynta ba kan treikam tang ïa uto u bar jylla uba la wan poi ha ka Jylla bad uba kin ïohi markhmat ïa u hashuwa ba kin ai ïa ka ‘Employee Clearance Certificate’.
Shuh shuh u la pyntip ba ka EC kan ym ïatynjuh bor bad ka Sorkar Jylla halor ka jingai laisen sha ki nongbylla hynrei kan leh katkum ka bor lajong.
U la pyntip ba ki nongshim wai haba ki leit wad ïa ki nongbylla ki ïakynduh nyngkong ïa kito ki briew kiba wanrah ban ai por hapoh 15 sngi ba kin pyndap ïa ki kot ki sla kum ka dur thep ‘vote’, ‘Aadhaar’, u nombor ‘phone’, ka jingpynshisha na ki trai ïing, na u Rangbah Shnong, na u trai ba ai bylla, na u pulit ophisar bad ar tylli ki dur.
Shuh shuh u la ïathuh ba ka KHADC ka donbor ban pynsangeh ïa ka jingtrei lada ki nongbylla kim pynbiang ïa ki kot ki sla hynrei kam donbor ban beh ïa ki namar ka bor ban beh ïa ki dei tang ka Sorkar Jylla.
