Shillong, Risaw 23
U MLA ka United Democratic Party na Mawsynram Constituency u Bah Olan Suiñ u la ong ba ka jingshna ïa ka ‘Rain Museum’ ha Mawsynram ka la ïaid shakhmat, ha kaba u kontraktor u la sdang ban trei.
Ïa kane u Bah Olan Suiñ u la pynpaw ha ka jingïakren sha ki nongthoh khubor ha ka sngi Palei, ha kaba u la pynpaw ïa ka jingkyrmen ba ïa kane ka projek yn lah ban pyndep hapoh 18 bnai, ha ka jinglut kaba T.25 klur.
U Bah Olan Suiñ u la ong ba, kane ka ‘Rain Museum’, la khmih lynti ba kan long ka jaka ban ai jingtip ïa ki nongwan jngohkai pyrthei ïa ka shnong Mawsynram bad kane ka projek kan long ka ban pynroi kyrpang ïa ka kyrdan jong ka thaiñ ba ka pyrthei kan tip ïa ka Mawsynram kum ka jaka kaba jur slap tam ha ka Pyrthei.
“Ynda la dep ban shna ïa ka ‘Rain Museum’ ka Mawsynram Constituency kan ïoh ïa ka kyrteng bad ka dur ba thymmai ha ka Jylla Meghalaya” la ong u Bah Olan.
U Bah Olan u la pynpaw ïa ka jingdonkam jong ka surok kaba bha na ka bynta ban kyntiew ïa ka kam jngohkai pyrthei hapoh Mawsynram constituency.
U la ong ba, ka jingmynjur ba dang shen ïa ka pisa na ka bynta ban pyntrei surok kan pynbha ïa ka jinglong jingman jong ka surok ha ka thaiñ Mawsynram bad kan khring, kan kham pynsuk ïa ki nongjngohkai pyrthei ban wan sha ka thaiñ.
“Haba nga leit sha ka constituency jong nga, ka jinglong jingman jong ki surok ka long kaba sniew haduh katta-katta bad teng-teng ngam sngew shngaiñ ban leit ban wan. Hynrei da ka jingïoh jingmynjur ba dang shen ban shna surok, nga kyrmen ba ka jinglong jingman ka surok kan kylla dur bad ba kane ïarap ban kyntiew ïa ka kam jngohkai pyrthei ha ka thaiñ” la ong u Bah Olan.
Katkum ka jingong jong u Bah Olan, ka jingshna ïa ka ‘Rain Museum’ bad ka jingpynbha ïa ka surok kyrmen ba kan ai dur thymmai ïa ka Mawsynram constituency bad kan kham khring ïa ki nongjngohkai pyrthei.
U Bah Olan u la pynpaw ïa ka jingsngewskhem ba ïa kine ki projek yn lah pyndep hapoh ka por ba la buh bad kan wanrah ïa ka jingkylla ha ka constituency.
