Shillong, Risaw 23
Ka Ïaraplang Nongrum ka la thep marwei haduh 11 kol na ka bynta ban pynlong ïa ka Laitkor SC ban pynliem ïa ka Lapalang da 23-0 kol ha ka jingïaleh-kai Group-A jong ka Meghalaya Women’s State League 2025 kaba la long ha ka lah sngi U Blei ha SSA Stadium, Polo.
Ïa kine ki kol, ka Ïaraplang ka la thep ha ka minit kaba 1, 7, 9, 25, 29, 60, 66, 68, 73, 80 & 90+1, ha kaba la pynbud sa ka Ilenaki Laloo (23 & 40), ka Saralin Warlarpih (26), Inrila-i-dor Khongthaw (30, 42, 45 & 49), Eiladki Ksoo (65 & 90), Ibashisha Khongwet (69, 83 & 87).
Haba sha ka jingïa-khun ha ka Group-B, ka Jakrem SC (Mawkyrwat District SA) ka la pynliem noh ïa ka Young SSCC (Pyndengumïong DSA) da 3-1 kol. Ïa kine la thep da ka Banhunlang Synrem (27), Banrihun Wahlang (47) bad ka Ïaphishisha Marbaniang (86), katba ka Bankyntiew Ryntathiang (32) ka la pynphai kylla shi kol ïa ka Young SSCC.
Kumta kaba sah ka long sa ïa ki artylli ki jingïakhun kiba dei jong ka Group-A, kiba la buh ban long ha ka sngi Saitjaiñ ha kaba ka Attacker’s Youth Club na Pahamsyiem kan ïakhun pyrshah ïa ka Lapalang ha ka por 10 baje mynstep ha Shillong, bad ha ka 27 tarik ka PFR ïa ka Laitkor ha ka juh ka madan.
