EU, Risaw:
Ka EU ha ka Sngi Balang, ka la mynjur ban pynngat kyndon biang ia ka Russia halor ka jingleit hiar thma ba khlem sangeh jongka, pyrshah ia ka Ukraine, ha kaba ka EU ha kane ka kynti ka la mynjur ban pynngat kyndon noh ia ki shlem saiñ umphniang ba kongsan eh jong ka Russia.
Kane ka rai, kaba 19 na ka liang ka EU, naduh ka ba sdang ka jingleit hiar thma ka Russia ha u snem 2022, ka long ruh ha kum kane ka por ba ka Europe ka wad ban pynjur ka jingpynbor ia ka Russia hakhmat ka jingpynbor ia ka jingsuk ba la lam khmat da u President ka US, u Donald Trump.
Ka Slovakia kaba long paralok bad ka Russia ka la pynsangeh noh ïa ka jingpdiang ïa kane ka jingïateh halor ka mat ba kyrpang namar ba ka wad ïa ki jingïada na ka bynta ka karkhana shna kali jong ka na ki aiñ jong ka EU halor ka jingkylla ka suiñbneng.
Kum shi bynta jong ki lad ki lynti kiba thymmai, ka kynhun jong ki 27 tylli ki ri ka wanrah ïa ka jingkhang ban wanrah ïa ka umphniang um na Russia haduh shisnem haduh ban da sdang u snem 2027.
Ka dang pynrung kyrteng ruh ïa palat 100 tylli ki jhad kit umphniang na kaba la khot ka “Shadow Fleet” jong ki lieng kiba la tymmen kiba la pyndonkam ban ïarap ïa ka Russia ban kiar na ki jingkhang halor ka jingshalan umphniang jong ka shabar ri.
Nalor ki jingpyrshang ban ktah ïa ka jingïohnong jong ka Russia, ka EU ka dang wad ruh ban pynshitom beiñ ïa ki nongmihkhmat jong ka Russia kiba la suba ba ki dei ki nongsyntiat da kaba pynjari ïa ki kyndon halor ka jingleit jingwan jong ki kylleng ka Europe.
Kito ki lad ki lynti kiba thymmai ki mut ba ki nongmihkhmat jong ka Russia ki hap ban pyntip sha ki bor synshar ha ki ri kiba ki don lada ki don kano kano ka jingleit shabar ri.
U myntri rangbah duh ka Slovakia, u Robert Fico, u la mynjur ban weng noh ia ka jingpyrshah jongu ia ki jingpynjari kyndon ha ka sngi thohdieng, hadien ba u la kam ba un ioh ia ki jingpynthikna kiba biang halor ka kam shna kali.
Ia katei ka rai, yn pyntikna lashai ka sngi, ha shuwa ba u President Volodymyr Zelensky jong ka Ukraine, un iasoh lang bad ki nongialam jong ka EU, ha ka jingialang ha Brussels.
