Shillong, Risaw 23
Ki artylli ki kynhun ki thei ïalehkai ka IR Iran bad ka Nepal ki la long ba la khreh ban ïakhun pyrshah ha ka Tri-Nation Interna-tional Friendly ka ban long ha ka sngi Thohdieng ha Jawaharlal Nehru Stadium, Polo ha ka por 6 baje janmiet.
U Coach ka Nepal u Nabin Neupane haba kren bad ki nongthoh khubor shi sngi shwa ban sdang kane ka jingïalehkai, u la ong ba kane kam dei ka sien kaba nyngkong jong u ban wan ïuh kjat ha ka nongbah Shillong, namar u la wan teng ha ki por ba la dep, haba ïa dei bad kane ka lympung.
U Neupane u la ong ba ki artylli ki kynhun kiba ka kynhun jong u kan hap ban ïakhun ki long kiba khlaiñ. Ka jingïakhun kan long kaba itynnad namar ka kynhun jong u ruh ka la long kaba la pynkhreh ban mih madan bad ka thong kaba ki don ka long ban ïoh ïa ki 3 point.
U Nabin u la bynrap da kaba ong, “Ngi la dep ïakhun teng bad ka India bad ruh ïa ka Iran ha kaba baroh ar tylli ki long kiba khlaiñ, hynrei ngin ïakhun tyngeh ha ki 90 minit.”
Ha kawei pat ka liang ka Coach ka Iran ka Marziyeh Jafaribaravati ka la ong ba ka kynhun ïalehkai jong ka Nepal ka long kaba khlaiñ, te kumta kan long kaba itynnad. Ka la bynrap da kaba ong ba ka kynhun jong ka, kan pyrshang ban ïakhun tyngeh bad pynbeit ïa ki jingduna kiba kum ka kynhun ka don.
Kumba ka paw ka Iran ka la khur ïa ka jingjop kaba nyngkong ha kane ka lympung pyrshah ïa ka India da 2-0 kol ha ka 21 tarik mynta u bnai.
Ha kane ka sngi na ka liang u Director ka tnat ïalehkai u D.D Shira u la pyllait paidbah ïa ka trophy jong kane ka lympung ha kaba la ïadon lang ruh ki coach lem bad ki kapten jong ki lai tylli ki kynhun.
